Krismas leh kum thar lawmna ruai

Kum 2016 Krismas leh 2017 kum thar lawm nan Mizorama kohhran hrang hrangten ruai an ṭheh a; Ramhlun North Presbyterian Kohhran Krismas leh kum thar lawmna ruai ṭhehtu an

ṭhahnem ber nia hriat a ni. Ramhlun North Kohhran ruai siamah hian Krismas-ah mi 4,179 leh kum tharah mi 3,550-in an ṭheh a ni.

Mizote'n hmanlai aṭang tawhin Krismas leh kum thar lawm nan ruai kan ṭheh ṭhin a, mipui nghahhlelh ber pawh a ni ṭhin. Ruai atan hian sum leh pai pawh kan seng nasa a; nimahsela heng sumte hi uiawmah kan ngai lo. Krismas leh kum thar kan lawm zawh taka Mizorama tualchhung kohhran mal lian zual ṭhenkhatte'n ruai an ṭheh dan kan zir chiang dawn a ni.

Bawngkawn Kohhran

Bawngkawn Kohhranah hian member 3,486 an awm. Krismas ruai atan vawk pathum, bawngsa kg. 540, arsa kg. 50, sangha kg. 30 leh thil dangte an siam a, buhfai no 1,700 an chhum. Mi 3,256-in ruai an ṭheh a; ruai ṭheh zat hi kohhran member zat aṭanga chhutin 93.40% an ni.

Kum thar lawmna ruai atan vawk panga, bawngsa kg. 450, arsa kg. 50, sangha kg. 30 leh thil dang dang an siam a, buhfai no 1,700 an chhum a; mi 3,233-in ruai an ṭheh.

BCM Lunglei Chanmari

Baptist Church of Mizoram (BCM) kohhrante zinga lian ber chu Lunglei Chanmari Kohhran nia hriat a ni a; member 2,000 chuang hret an awm. Krismas ruai atan bawngsa kg. 200, vawk pathum, arsa kg. 52, sangha kg. 15 leh thil dangte an siam a, buhfai kg. 250 an chhûm. Mi 1,767-in ruai an ṭheh a; Rs. 3,37,825 an sêng.

Kum thar ruai atan bawngsa kg. 200, vawk pathum, arsa kg. 50, sangha kg. 15 leh anhnahte an siam a, buhfai kg. 250 an chhûm. Ruai ṭheh zat chu mi 1,883 an ni a, Rs. 2,31,546 an hmang. Krismas leh kum thar ruai atana an sum sên zat chu Rs. 5,69,370 a ni.

Bungkawn Kohhran

Member 3,280 vel awmna Bungkawn Presbyterian Kohhran chuan Krismas leh kum thar lawmna ruai atan Rs. 11,80,366 an hmang. Krismas ruai atan bawng pathum, vawk panga, arsa kg. 95 leh thil dangte an siam a, buhfai no 1,200 an chhûm. Mi 2,600-in ruai an ṭheh a; an sum sen zat chu Rs. 6,40,406 a ni.

Kum thar ruai atan bawng pathum (kg. 587), vawk panga (kg. 543), arsa kg. 69 leh thil dang dang an siam a, buhfai no 1,250 an chhûm. Mi 2,813-in ruai an ṭheh a, ruai atan Rs. 5,39,960 an séng.

Chaltlang Kohhran

Chaltlang Kohhranah member 3,062 an awm. Krismas ruai atan bawng pahnih, vawk panga, arsa leh sangha eng emaw zat leh thlai leh thil dangte an siam a; mi 2,656-in ruai an ṭheh.

Kum thar ruai atan bawng pahnih, vawk pali, arsa leh sangha eng emaw zat leh thil dang dang an siam a, ruai ṭheh zat chu mi 2,591 an ni.

Champhai Vengthlang KOHHRAN

Aizawl páwn lama tualchhung kohhran lian ber chu Champhai Vengthlang Presbyterian Kohhran a ni a, October 2016-a an inchhiarna ang chuan member 2,986 an awm.

Krismas ruai atan bawng pathum, vawk pali, arsa kg. 25 leh thil dangte an siam a; kum thar ruai atan pawh bawng pathum, vawk pali, arsa kg. 25 leh thlai leh thil dang dang an siam a ni.

Chanmari Kohhran

Mizorama Kohhran lian ber dawttua ngaih Chanmari Presbyterian Kohhranah member 4,000 an tling lo deuh a, ruai ṭhehtu an ṭhahnem hle.

Krismas ruai atan bawng pathum, vawk paruk, arsa kg. 50, sangha kg. 50 leh thil dang dang an siam a; mi 3,319-in ruai an ṭheh. Kum thar lawmna ruai atan bawng pathum, vawk panga, arsa kg. 40, sangha kg. 40 leh thil dang­te an siam a; ruai ṭhehtu zat chu mi 3,639 an ni. Kum thara ruai ṭheh zat hi kohhran member zat aṭanga chhûtin 89% vela ngaih a ni.

Khatla Kohhran

Khatla Presbyterian Kohhranah hian member 2,262 an awm a, Krismas leh kum thar ruai atan Rs. 11,54,750 an sêng. Anni kohhran hi an din tirh aṭanga tun thlengin thlangrá-a hnah phahin hlui an la siam ṭhin a, hlui chu dawhkânah dah kângin an kîlho ṭhin. An kohhran mite'n hlui siam hi an la hlut hle a, mahnia thlèng cháwia ruai ṭheh aiin, hluia chaw ei an tam zawk hle a ni.

Khatla Kohhran hian Krismas ruai atan bawng pahnih, vawk pali, arsa kg. 40, sangha kg. 12 leh thil dang dang an siam a; mi 1,960-in ruai an ṭheh a, chu'ng zinga 1,408 chuan hluiah an ṭheh. Ruai atan hian Rs. 5,90,600 an séng.

Kum thar ruai atan bawng pahnih, vawk pali, arsa kg. 40, sangha kg. 12.5 leh thil dangte an siam a, Rs. Rs. 5,64,150 an séng. Mi 1,964-in ruai an ṭheh a, chu'ng zinga mi 1,368 chuan hnahphahin hluiah ruai an kîl a ni.

Mission Veng KOHHRAN

Mission Veng Presbyterian Kohhran hi Mizorama kohhran mal zinga lian ber, member tamna ber a ni a, member 4,095 an ni. Chutih laiin, kohhran member zat ngaihtuahin ruai ṭheh zat erawh an tam lutuk lo a, anni aia ruai ṭhehtu tam zawkna a awm nual. Krismas-ah kohhran member zat aṭanga chhûtin 73.28%-in an ṭheh a, kum tharah 75.82%-in an ṭheh.

Mission Veng Kohhran hian Krismas ruaiah bawng pathum (kg. 576), vawk pasarih (kg. 678.5), arsa kg. 50, sangha kg. 40 leh thil dang eng eng emaw an siam a, buhfai no 1,700 an chhum. Ruai ṭhehna hmunah mi 2,821-in an ṭheh a, damlo 115 leh damdawi-inah mi 65 tan ruai sa pein, ruai ṭhehtu zawng zawng chu mi 3,001 an ni.

Kum thar ruai atan bawng pathum (kg. 649), vawk pasarih (kg. 688), arsa kg. 50, sangha kg. 40, anhnah leh thil dang dang an siam a, buhfai no 1,700 an chhum. Ruai ṭhehtu mi 3,105 an ni a, an zinga 160 chu damlo an ina sa pek leh 65 chu damdawi-ina awm pekte an ni.

Mission Vengthlang KOHHRAN

Mission Vengthlang Kohhranah member 3,000 chuang hret an awm. Krismas ruai atan sa chi kg. 940 an siam a, buhfai no 1,680an chhum a; mi 2,580-in ruai an ṭheh.

Kum thar ruai atan sa chi hrang hrang siam kg. 961 leh thil dang dang an siam a, buhfai no 1,770 an chhum a; mi 2,870-in ruai an ṭheh. Krismas leh kum thar lawmna ruai atana an senso zat chu Rs. 9,11,753 a ni.

Ramhlun North KOHHRAN

Ramhlun North Kohhranah hian member 3,500 chuang an awm a; Krismas leh kum thar lawmna atan Rs. 13,72,181 an hmu a, ruai bakah, Krismas leh kum thar behbawma thil dang atana hmante nen Rs. 15,74,853 an hmang. Krismas leh kum thar lawmna ruai

ṭhehtu tamna ber kohhran an ni.

Krismas ruai atan buhfai no 1,900 an chhûm a; ruai ṭhehna hmunah mi 3,924-in ruai an ṭheh a, damlo leh damdawi-ina pek chhuahte nen mi 4,179-in ruai an ṭheh. Ruai ṭhehtu zat hi kohhran member zat aiin an tam zawk. Krismas ruai atan hian Rs. 7,77,793 an séng.

Kum thar ruai atan bawngsa kg. 622, vawksa kg. 787, arsa kg. 31.5, sangha kg. 20 leh thil dangte an siam a, buhfai no 1,800 an chhum. Mi 3,550-in ruai an ṭheh a, Rs. 4,87,385 an hmang.