Health dept. sum endik thut hi Health Minister benghniam tumna - Cong

MPCC chuan thuchhuah siamin, Health department-in Covid-19 atana sum an hman dan  Accounts and Treasuries department hnuaia Special Audit Team-te endik tir chu Health Minister benghniam tumnaah an ngaih thu an tarlang.

MPCC chuan Finance department thu angin Special Audit Team chuan Covid-19 chung­changa Health department sum hman dan an endik ṭan tih tarlangin, "Health department sum hman dan endikna (audit) hi hmanhmawh taka kalpui turin Finance department hian Accounts & Treasury department a hriattir a ni. An endik tan ni, June 18 khan endik an nih tur thu hi Health department official ṭhenkhat chuan an hre ve chauh," an ti.

COVID-19 vanga Health department an buai hle laia internal audit hmanhmawh taka kalpui a ni ta rum rum mai mak an tih thu tarlangin MPCC chuan, "MNF vice president aṭanga an paih tak, Covid-19 dona kawnga mipui fak hlawh tak ni si Dr R Lalthangliana umzui zelna leh amah benghniam tumna diktakah kan ngai," an ti a, Health Minister benghniam tumna thil avang mai maia Covid-19 dona kawnga buai em em Health department hotu leh thawktute'n rilru hnual rawihna tham an tawk chu mak an tih thu an sawi.

MPCC chuan Health department endik an nih ang tho hian Covid-19 dona atana sum hmang hnem ve tho Disaster Management & Rehabilitation  leh Home department-te sum hman dan an endik ngam ve dawn em tih an thlir reng thu an tarlang.