YMA chanchinbu enkawltute pualin Media Workshop 2020 buatsaih a ni

Information & Public Relations department leh Central YMA chuan nimin khan CYMA Hall-ah YMA chanchinbu enkawltute pualin chanchinbu enkawl dan zirhona 'Media Workshop 2020' an buatsaih a, deputy chief minister Tawnluia’n a hmanpui.

Deputy Chief Minister chuan, YMA chu ṭhalaite a náwlpuia an fuan khawmna a ni tih sawiin, "Kan khawtlang leh hnam nun timawitu a ni a, YMA thiltumte hi a zahawm a, kan hnam leh khawtlang nun innghahna lungphûm pawimawh tak a ni," a ti.

YMA branch chanchinbu enkawltu fakawm a tih thu sawiin Tawnluia chuan, hlawh nei loa hun leh thâ sênga khawtlang hmasawnna tura tlawmngaia thawktu an nih thu a sawi a, "Khawtual mipuiin an chhiar leh bengkhawn, mipui beng tivartu an ni a, tunlaiah eizawnna a dang tawh a, hun âwl kan neih tlêm tawh laia ṭhenawm khawvéngte inkara palai hna thawk a, inpawhna ṭha siamtu an ni," a ti. Chanchinbua thu chhuah turah fimkhur a ṭul thu leh thu belhchian dâwl lo chhuah lo tura fimkhur a ṭul thu a sawi bawk.

Khualzahawm Lallianpuii, IPR director pawhin thu sawiin, YMA chanchinbu enkawltute chu an pawimawhzia hre thar fo turin a chah a, YMA chanchinbu enkawltute chu working journalist ang ni lo mah se, chanchinbumite tih tur leh tih loh tur chi hrang hrangte an hriat a ngaih thu a sawi. Social media hman fimkhur inzirtir a pawimawh thu sawiin, "YMA chanchinbu enkawltute chu rilru puitling pu tur an ni a, thu dik ngainat a pawimawh a, grammar uluk a pawimawh bawk," a ti.

IPR department leh CYMA hian a vawi khat nan kum 1999-ah media workshop an buatsaih dun a, nimina an buatsaih hi ṭang duna workshop vawi 13 an buatsaihna a ni. Workshop-ah hian Aizawla YMA branch 83 leh Aizawl páwn lama YMA branch 58 aṭangin YMA chanchinbu editorial board member-te an tel a ni.