Covid-19 donaah Mizo nun ze mawi a lang chhuak hi a lawmawm - MNF

MNF party chuan thu­chhuah siamin, Covid-19 donaah Mizo hnam nun ze mawi hrang hrang a lang chhuak chu lawmawm an tih thu an tarlang a, Mizote chu hnam anga an ṭang rual ṭhat thu an sawi.

MNF chuan, Health department-a doctor leh thawktu dangte leh damdawi-in dangte pawhin theihtawp an chhuah tih sawiin, "Chief Minister, minister te, ruling MLA leh opposition MLA-te pawhin theihtawp an chhuah vek a, kohhran hruaitute pawhin quarantine nan biak-in leh a hmunhma an pek phal bakah, quarantine-te an la châwm zui hi lawmawm kan ti tak zet a, media hrang hrangte thawhrimna pawh lawmawm kan ti hle a ni," an ti.

Mizoram leh mipui him nan police-te leh task force-te'n theihtawp an chhuah tláng vek tih sawiin MNF chuan, "Thing­tlang lama khawsak harsa tak takte pawhin mahni hna ṭul kalsanin, ramri venghim turin in leh lo chhuahsanin an duty char char a ni," an ti a; khua leh veng hrang hranga task force te, magistrate leh sorkar hnathawk te, hlawh phût loa Covid-19 donaa inpe chungah lawm­thu an sawi a ni.

MNF chuan, Co­vid-19 laka Mizoram a him zel theih nan inven fimkhur chhunzawm a ngaih thu sawiin, chumi atan chuan mobile phone application Aarogya Setu a pawimawh thu an sawi a, "Aarogya Setu hi Co­vid-19 lakah kan him em, kan bul hnaiah kai an awm em tih mobile phone hmanga mahni in test reng theihna a ni," an ti a; Aarogya Setu hmang turin mipui an ngen.