SEDP-ah vaimim chi sem zel a ni ; Ram nei lote pawh dawntir an ni

Mizoram sorkar flagship programme, Socia Economics Development Programme (SEDP) hnuaiah vaimím chî sem chhun­zawm zel a ni a, chutih laiin, vaimim chînna tur ram nei lote pawh dawntir an ni.

Vanglaini thu dawn danin, hmun ṭhenkhatah chuan vaimím chìnna hmun tur ram an neih leh neih loh pawh zawt chiang hmasa loin SEDP hnuaiah vaimim chi dawng tura thlan an ni a; dawng tura thlan zingah vaimim chìnna tur ram nei lote pawh an tel. Vaimim chi dawng tura thlan zingah dawng duh lote pawh an awm a, ram nei lo zingah dawng an awm tho bawk.

Vaimim chi dawng tura thlan pakhat chuan, local council lam aṭangin SEDP dawng tura thlan an nih thu phone kaltlanga hrilh an nih thu Vanglaini a hrilh a, "Kan sum dinhmunin a zir loh êm avangin kan lawm hman viau a, mahse, kan han hre chiang chu, vaimim chi chauh dawng tur kan lo ni. A chìnna hmun tur ram pawh kan nei lo hrim hrim," a ti.

Aizawl veng pakhata vaimim chi dawngtu pakhat chu mi in luaha khawsa a ni a, vaimim chìnna tur ram a nei lo. Vaimim chi a dawn chu mamawh leh duh tur zâwt kualin, duh an awm chuan a pe ṭhin.

Vaimim chi dawng tura tih pakhat chuan a chìnna hmun tur a neih loh thuin a chháng a, mahse, an venga MNF hruaitute'n pawisa pawh a ken tel dawn thu an hrilh a ni.

Vanglaini thu dawn danin, vaimím chi hi SEDP buaipuitute'n dawng tura an thlante hnenah Agriculture department-in a pe ṭhin a; mi pakhat hnenah vaimim chi ip khat (kg. 20) zel pek a ni a, district hrang hrangah sem mek zel a ni.

Tun thla laihâwl thleng khan SEDP hnuaiah vaimim chi mi 13,000 chuang pek an ni tawh a, dawng thar an awm zel avangin dawngtu zat chiah hriat theih a ni rih lo.

Vaimim chi an sem ip (bag) páwn lama a lan dan chuan, vaimim chi chu National Agricultural Cooperative Marketing Federation of India Ltd. siam a ni a, ip khat Rs 5,851 man niin, kg. khat man chu Rs 292.55 tihna a ni.

Agriculture department hotute chuan, vaimim chi chu a ipa inziak angin an lei lo niin an sawi a, "Kg khat Rs 143.50 hisápin kan lei. A chi tura uluk taka sâwngbàwl a ni a, tualchhunga hralhna ai chuan a to deuh mai thei," an ti a, vaimim chi an sem chu ip khat Rs 2,870 man a nih thu an sawi.