CT scan hman theih loh chhan sawifiah

Health & Family Welfare (HFW) department chuan thuchhuah siamin, Civil Hospital, Aizawl (CHA)-a CT scan chungchang an sawifiah a; CT scan thar nei turin Mizoram sorkarin inthlahdah loin theihtawp a chhuah niin an tarlang. ZPM chuan CT scan khawl hi April, 2022 chhung ngeia bunfel an phut a ni.

Health department chuan, mipuiin CT scan khawl an ma­mawhna hriain Mizoram sorkarin theihtawp a chhuah reng nia sawiin, "Department pawhin rang taka peih hi a duh dan a nih mai bakah, tha thlah awm loin CT scan thar nei tur hian theih tawp a chhuah reng a ni," an ti a; harsatna hrethiam turin mipui an ngen.

HFW department tarlan danin, CHA-a hman ṭhin GE company siam CT scan (16 slices) chu August 16, 2013-ah bun a ni a, kum riat chhung hman a ni. CT scan chu a chhia tih November 10, 2021 khan hriat a ni a, khawl hlui tawh a nih avangin a man nena chhûtin thawm ṭhat chi a ni lo a, company nen inremsiamin de-commission a, lei lêt turin thutlukna siam a ni. Khawl chu February 22-24, 2022 chhungin ṭhiah darh a ni a, GE company-in an la let nghal.

Siemens company siam CT scan thar ṭha zawk (64 slices) chu Rs 2,60,00,000-in lei zui a ni a; khawl ṭhenkhat chu October 13, 2021 khan a thleng a, October 20, 2021-ah bungraw dang a thlen belh bawk.

CT scan khawl thar chu bun nghal mai theih a ni lo tih tarlangin HFW chuan, "Atomic Regulatory Board (AERB) thupek leh duh dan ang veka kal ngai a ni. A dahna room tur pawh nasa taka renovate (chei ṭhat) a ngaih bakah, company duh dan ang thlapa UPS room (battery room), electrification, earthing, AC fitting leh accessory-te tih ngai vek a ni," an ti a; hun a duh rei niin an tarlang.

Department-in hma a la char char nia sawiin HFW chuan, "Tunah hian civil work peih vek a ni tawh. Installation leh panel board test charge ti turin April 29, 2022 hian Kolkata aṭangin company aiawhte lo kal tura tih a ni," an ti.

Tarlan tawh angin, ZPM party hruaitute chuan an working president K Sapdanga hoin April 19, 2022 khan CHA-a CT scan khawl thar bun hna thawh dan a hmunah kalin an enfiah nawn leh a, an enfiah vawi thumna niin, April 2022 chhung ngeia bun fel turin sorkar an phût.

ZPM Working President chuan, mipui mamawh lian tak, nunna leh thihna hril thei, mi rethei zawkte'n an ban phak Civil Hospital-ah hun rei tak khawl pawimawh hman theih loha a awm chu pawi an tih thu sawiin, "Sorkarin a peih thei lo hi a mak kan ti. Nikuma khawl thar lei, tun thlenga la hman theih loh hi technical problem aiin, ngaihsak loh vang a ang zawk. Sorkar hotute aṭangin tumna tak tak a awm lo niin a lang," a ti.