Vairengtea YMA-in hnam dang pasal neite dan phal chin bak awm phal lo

Vairengte Field Veng Branch YMA chuan, YMA kumpuan, 'Ram leh hnam humhalh' tih chu chak zawka bawhzui an tum a, chumi atana an hmalakna pakhat atan hnam dang pasal nei, sorkarin a phal chin bakte chu an venga awm an remti dawn lo.

YMA kumpuan bawh­zuiin Vairengte Field Veng Branch YMA hian tun hnai khan an huam chhunga hnam dang awm zingah inner line permit (ILP) an enfiah a, hnam dang pasal nei awm tharte an enfiah nghal bawk.

Hnam dang pasal neite chu kumin aṭang chuan an veng chhungah an awm a rem tawh dawn lo tih an sawi a, sorkarin awm a phalsak chinte erawh chu an awm zui an remti thung.

April 22, 2022 khan Saipum aṭanga an venga pém thar hnam dang pasal nei chhungkua chu an veng chhungah awm an remtih loh avangin inthiar fihlim turin Vairengte Field Veng YMA chuan an hriattir a ni.

Vairengte Field Veng YMA hian April 25, Thawhṭanni zing khan Aitlanga hnam dang chhungkua 18-a an pa ber ṭheuhte chu Hermon Veng Section YMA Rûnah an ko khawm a, an ILP an enfiah. ILP nei mi pakhat chiah a awm a, ILP nei lote chu ILP siamna hun an bituk a ni.