FEMSE-in rawtna anga hlawh pe thuai turin sorkar an ngen

Federation of Mizoram Samagra Shiksha Employees (FEMSE) chuan thuchhuah siamin, an hlawh chungchangah kum hnih dáwn a liam hnuah thu chhia a ṭha a la awm lo chu mak an tih thu an tarlang a; rawtna awm tawh anga hlawh pe thuai turin Mizoram sorkar an ngen.

FEMSE chuan, Samagra Shiksha (tun hmain SSA leh RMSA) hnuaia thawktute chuan kum 12 dáwn hlawh ennawn lohin an awm a, 6th Pay leh 7th Pay pawh an hmang ve lo tih sawiin, "Hma kan la a. Kan service leh hlawh chungchang zir chiang tur study group chu December 2019-ah sorkarin min dinsak a, pandemic-in min tihbuai avangin kum khat dáwn an zir chian hnuin November 2020 khan sorkarah recommendation (rawtna) an thehlut," an ti a; study group rawtna chu an duhthusam ni lo mah se, ṭha thawkhata an ngaih thu an sawi.

Study group rawtna chu beiseina sang tak nena an thlir laiin, kum hnih dáwn a liam hnuah thu chhia a ṭha a la awm lo chu mak an tih thu sawiin FEMSE chuan, "Kan dinhmun leh hlawh chungchangah lungawi loh thlak ta hlein kan hria. Dinhmun ṭha ve deuh leh innghahna tlak hlawh neih ve kan duh tawh tak zet a ni," an ti.

FEMSE chuan, Samagra hnuaia thawkte chu Mizoram hmun kilkhâwr tak tak thleng dâp chhuaktu leh mahni thawhna hmunah pawh rinráwl ber an nih thu an sawi a; study group-in an dinhmun mil tura rawtna a siam chu an lak ve vat theihna turin Mizoram sorkar an ngen a ni.