MGNREGS-ah job card 2,08,816 a awm

State Institute of Rural Development & Panchayati Raj (SIRDPR), Mizoram leh SLMC-IAC hnuaia thawkte tan nimin aṭangin SIRDPR, Durtlangah training buatsaih a ni a, Rural Development secretary R Zarzosanga'n a hmanpui. He hunah hian Mizoramah MGNREGS hnuaiah job card 2,08,816 a awm mek tih tarlan a ni.

R Zarzosanga chuan, mi dangte zirtirtu ni tura hmasawn zelna atana intuaitharna neih a ni ṭhin tih sawiin, "Kan ruahmanna siamte a hlawhtlin theih nan mahni zâwn ṭheuhah nasa zawka ṭan kan lâk zel a ngai," a ti.

RD Secretary tarlan danin, Mizoramah MGNREGS hnuaiah job card 2,08,816 a awm mek a, hna chi hrang 23,408 thawh tawh niin, chu'ng zinga 18,721 chu leilung humhalh hna leh 14,601 chu chhungkaw malin an chhawr ṭangkai theih hna a ni.

Kum 2021-22 chhungin thingtlangah in sak ṭanpuina mi 5,511 hnenah pek a ni a, ṭanpuina dawng thei tura in ziak lut mi 25,539 an awm. LAD nen inṭâwmin khaw pangaah panchayat bhavan sak mek a ni a, SRLM hmalaknain self help group 8,199 din a ni tawh.

SEDP hnuaiah cheng nuai 217.2 hmangin suspension bridge pariat siam a ni tawh a; PMKSY Version 2.0-ah project 18 atan DPR buatsaih mek a ni a, sorkar laipui tum tur cheng nuai 702.45 pawh sorkarin a dawng tawh bawk.