IGNOU-in convocation an hmang

Indira Gandhi National Open University (IGNOU), Aizawl Regional Centre chuan nimin khan Dawrpui Multipurpose Hall-ah convocation an hmang a, Mizoram University vice chancellor Prof. KRS Sambasiva Rao-a'n a hmanpui.

Prof. KRS Sambasiva Rao chuan, IGNOU-in zirna changtlung zawk mi tute tan pawha a pe thei chu lawmawm a tih thu sawiin, zirnaa hlawhtlinna changte a lawmpui thu a sawi a, "IGNOU hi university lian tak, zirlai maktaduai thum chuang awmna a ni a, India ram páwn aṭang pawhin zirlai ṭhahnem tak an awm," a ti.

MZU Vice Chancellor chuan, IGNOU hnuaia programme leh zirnate chu skill base leh hna leh eizawnna tlak a nih thu a sawi a, IGNOU-a degree-te chu university dang nen danglamna a awm loh thu a sawi bawk.

IGNOU regional director Dr SR Zonunthara chuan, IGNOU regional centre 32-ah convocation hman a nih thu leh a hmanna pui ber chu IGNOU Headquarters, New Delhi-ah Union Education Minister hoa hman a nih thu a sawi.

IGNOU hnuaia December 2020 leh June 2021 chhunga zirlai 2,91,588 final exam zinga zirlai 1,016 chu Aizawl Regional Centre-a mite an ni a; zirlai zir zo - master degree-ah mi 364, bachelor degree-ah mi 487, diploma mi 57 leh certificate course mi 108 an awm a ni.