SEDP kan kalpui chhunzawm zel dawn - Dr R Lalthangliana

MNF adviser Dr R Lalthangliana, minister chuan, SEDP an kalpui mek chu an chhunzawm dawn tih a sawi a, Pathian leh mipui zarah kum 2023 inthlanpuiah MNF an sorkar leh ngei dawn niin a sawi.

Nimina MNF Tuipui South Block-III Political Training, South Vanlaiphai community hall-a neihah thu sawiin Dr R Lalthangliana chuan, "Vawiinah mi thar Mizo hnam party-ah kan inlâwm lut hi lawmawm ka ti hle. Pathian leh mipui zarah nakkum kum tawp inthlanah MNF hi a sorkar leh ngei dawn a ni. SEDP kan ti mek a, kan la tih chhunzawm zel dawn," a ti.

R Lalthangliana chuan, Health department-ah post ruak 3,000 chuang a awm mek thu sawiin, "A ṭul ngawih ngawih leh pawimawh bik chu Chief Minister hoin Finance leh DPAR-te nen ngaihtuahna séngin kan la sawiho dawn a, hnawhkhah kan la tum," a ti a; health sub-centre 371 chu kuminah health & wellness-ah hlân kai hman an inbeisei thu a sawi.

Dr Thangtea chuan, Mizoramah hmarchhak biala lian ber tur Cancer Superspeciality Hospital din tum a nih thu a sawi a; Bangladesh nena insumdawn tawnna turin hmalak mek a nih thu sawiin, "Hman nía Delhi ka zu kal khan heng lai lui lian intlawhpawh zung zung theihna turin Union minister Sonowal pawh lawng changkang deuh chi min pe turin ka dil a, a hmunhmate an rawn endik tawh a, min pek thuai ka beisei," a ti.