MNF Minister-te'n BJP Mini-ster-te hmuh tumin thlan tla hluamin an um thin - BJP

BJP, Mizoram Pradesh chuan nimin khan thuchhuah siamin, MNF party leh MNF kaihhruai sorkar chu BJP-a inleh dan ze danglam khèl mek an tih tarlangin central minister lo zinte hmuh tuma an beih nasat ṭhin thu an sawi.

Mizoram BJP chuan, MNF minister-te'n sorkar laipuia minister-te hmaah NDA an nihna mai bakah, national BJP thûk zawka hnaih an duh thu an sawi ṭhin a, central minister Mizorama rawn zinte hmuh tumin Lengpui Airport leh an thlenna Raj Bhavan thlengin thlan tla hluamin MNF minister-te'n an ûm ṭhin niin an sawi.

MNF adviser Robert Romawia Royte, minister-in Siahaa thuthar thehdarhtute a kawmnaah, 'Central sorkarin Mizoram BJP aiin MNF sorkar min duhsak zawk' tia a sawi chu BJP chuan an chháng a; "Kar hmasa lawkah CM berin BJP an zawm loh thu leh an thawhpui loh thu a sawi mek laia Pu RRR-a'n CM thusawi dodal zawnga a ṭawng leh hi MNF ministry kalphung fel lohzia tilangtu leh CM Pu Zoramthanga a ngaihnêpzia tihlanna a ni," an ti.

Robert Romawia'n LADC leh CADC-ah hmasawnna a kal mup mup bik anga a sawi chu dâwt phuahchawp a nia sawiin BJP chuan, "A zah theih loh thlak hleah kan ngai. Hei hi Mara mipui hmuhsitna a nih bakah, a aia senior minister Dr K Beichhua mawng hlîm mualphosak a duhna a ni," an ti.

BJP chuan, CM Zoram-thanga sorkar leh MNF hotute'n kal zelna kawng an bo nia sawiin, "MADC election campaign neih mekah hmasawnna thil tih ṭhat leh mipui beiseina sawi tur an hre lo," an ti a; kum 2023-a Mizoram Assembly inthlanpui chu MNF-in an huphurh a, ze dang khèlin BJP-a luh beiseina avangin Narendra Modi sorkar tlawn leh fakin, tuna Mizoram BJP hruaitute dinhmun luahlan tumah MNF hotute an puh a ni.