MzSRLM Annual Action Plan zirho

Rural Development (RD) minister Lalruatkima chuan nimin khan Chanmari YMA Hall-ah Mizoram State Rural Livelihoods Mission (MzSRLM) Annual Action Plan 2022-23 Roll Out Workshop a hawng.

Lalruatkima chuan, Covid-19 léng avanga kum hnih chhung rollout workshop neih theih a nih loh thu sawiin, "MzSRLM hmalaknaa thingtlanga mi harsa zawkte'n self help group (SHG) kaltlanga hmasawnna an nei hi a lawmawm. MzSRLM hnuaia thawkte ṭhahnemngaihna leh inpekna vang a ni," a ti a, tun aia ṭhaa thawk zel tur leh thawhhona ṭha nei zel turin a chah.

Sorkarin theihtawpin MzSRLM leh SHG-te hmalakna a ṭawiawm zel dawn tih sawiin Lalruatkima chuan, "MzSRLM bakah Rural Development scheme hrang hrang MGNREGS, PMAY leh SPMRM-te kaltlanga Mizoram thingtlang mite tan hmasawnna hrang hrang kalpui mek a ni," a ti a; PMKSY Version-2 hnuaiah block 26-a cluster 12 tuam turin ruahmanna kalpui mek a nih thu a sawi.

MzSRLM hian Mizoram district 11 leh RD block 26-ah hmalakna a kalpui mek a, thingtlang khua 684 lut tawhin, SHG 8,249 din a ni tawh a, SHG-ah member 72,025 an awm mek a ni.