Kum hnih dáwn hnuah Aizawl district-ah Hripui vei hmuh chhuah loh ní a thleng

April 25, Thawhṭanni khan Mizoramah Covid-19 vei mi 102 hmuh chhuah a nih laiin, Aizawl district-ah hmuh chhuah a ni lo a, kum hnih dáwn hnua Aizawl district-a Covid-19 positive hmuh chhuah loh ni hmasa ber a ni. Nimin khan hripui vei dam tawh mi 101 chhuahtir an ni a, hripui vangin mi pakhat a thi.

Thawhṭannia hripui vei hmuh chhuahte chu mipa 44 leh hmeichhia 58 an ni a; RAT hmanga hmuh vek niin, positivity rate chu 13.73% a ni. RT-PCR leh TrueNAT hmangin swab sample endik ni mah se, positive an awm lo a, FIA hmangin sample endik a ni lo.

April 25-a Covid-19 positive vei hmuh mi 102 zingah district khawpuia mi pathum (2.94%) chiah, Saitual Chhimveng mi vek an tel a, mi 99 (97.06%) chu district khawpui páwn lama mite an ni. Saitual district-a Ngopa khuaah positive mi 27 hmuh chhuah a ni a, Sialhawkah mi 20 hmuh a ni bawk.

Hetih lai hian, Aizawl district-ah swab sample 92 endik ni mah se, Covid-19 positive hmuh a ni lo a, kum hnih dáwn hnua hripui vei hmuh loh ni hmasa ber a nih thu Health department-a thawkte chuan an sawi.

IDSP record angin, Mizoramah Covid-19 vei 2,26,988 hmuh chhuah a ni tawh a, mipa 1,05,713 leh hmeichhia 1,21,275 an ni a, mipa aiin hmeichhia 15,562-in an tam zawk. Nimin tlai dar 5 thleng khan mi 2,25,697 (99.43%) chhuahtir an ni tawh a, mi 696 (0.31%) thi tawhin, enkawl mek mi 595 (0.26%) an awm.

Nimin tlai dar 5 dinhmun angin, Siaha district-ah hripui vei enkawl mek an awm tawh lo a; Lawngtlai, Champhai, Kolasib leh Hnahthial district-ah active case 10 an tling tawh lo vek. Saitual, Serchhip leh Mamit district-ah 100 aia tam an la awm thung.

Kum 2011 chhiarpui aṭanga chhûtin, Mizorama Covid-19 vei hmuh tawh 2,26,988 chu mi 1,000 zelah hripui vei mi 206 an awm ang a ni a; mi 1,00,000 zela Covid-19 vangin mi 63 an thi tawh ang a ni tih sorkar thuchhuakin a tarlang.