Minister-in ram danga medal late lawmpui

Sports & Youth Ser­vices minister Robert Romawia Royte, Mizo­ram State Sports Council president ni bawk hoin nimin khan a pisaah international level-a inelnaa medal la Mizo naupang pathum leh Republic Day camp-a tel Mizo NCC ṭhalai parukte lawmpuina hun hman a ni.

International-a medal latu lawmpuite chu - January 30 - February 3 chhunga Sweden-a Golden Girls International Boxing Tournament-a silver medal latu Rudy Lalhmingmuani te, December 17-22, 2019 chhunga UAE-a IMFA Asian Muaythai Championship-a silver medal latu Joseph Vanlal­hruaia leh Eliza Zoramchhana te an ni. Republic Day camp-a telte chu - Vanlalchhanhimi, Ngurnunsanga Sailo, Ruthi Rochanpuii, Joshua Remlalliana, Samuel PC Lalhriatpuia leh K Lalmuanpuii te an ni.

Robert Romawia chuan, kum khat chhungin SYS department hnuaia hmasawnna leh hlawhtlinna tam tak a awm thu a sawi a; sport-a hlawhtlinna changte tan chapo a awl thu sawiin, ṭhalai hlawhtlingte chu chapo lo tur leh fimkhur turin a chah.

Sports Minister hian infiammite leh NCC cadet-te chu lawmpuina thilpek a hlan a; Rudy Lal­hmingmuani'n a hmain Kit Allowance a dawn loh avangin Rs. 20,000 a hlân tel.