PM Modi-a'n Chief Minister-te a kâwm Covid-19 do zel dan tur a sawipui

Prime minister Narendra Modi chuan nimin khan state chief minister-te leh union territory lieutenant governor-te video conference a neihpui a, Covid-19 lêng mek dinhmun leh do zel dan tur a sawipui. Sawihonaah hian chief minister Zoramthanga pawhin thu a sawi.

Prime Minister chuan, hripui donaah thawhhona ṭha neih zel a pawimawh thu sawiin, "Hripui léng a la reh tak tak loh avang leh harsatna min thlente chinfel vek a la nih loh avangin, nunphung pangngai zawh leh kan tumnaah hian kan fimkhur tlàn a ṭul," a ti a; Covid-19 vaccine la thei apiangin la zel se a duh thu a sawi.

CM Zoramthanga pawhin thu sawiin, Covid-19 hmachhawnnaa sorkar laipuiin state sorkar a puihnaah lawmthu a sawi a, "Mizoram chuan endik, sûlhnu chhui, enkawl, vaccine pek leh Covid nunphung dikte ṭha takin a kalpui a, sorkar policy zawm ṭhat avang te, kohhran leh tlawmngai pawl ṭawiawmna ṭha tak avangtein hripui vei an tlahniam mek a ni," a ti.

Tun dinhmunah Mizoramah Covid-19 vei enkawl lai mi 759 la awm mah se, damdawi-ina enkawl mek chu mi 20 an tlin tawh loh thu sawiin Zoramthanga chuan, "Natna dang nei tel ICU-a enkawl lai pakhat chauh a awm," a ti a; hripui vei tawh zat aṭanga thi zat chu 0.3% chauh a nih thu a sawi.

Chief Minister chuan, PM CARES hnuaia PSA oxygen plant 13 Mizoramin a dawnte chu district hospital-ahte leh cancer hospital-ah bun vek a nih tawh thu a sawi a, "Hei vang hian medical oxygen chungchangah tun dinhmunah harsatna a awm lo," a ti.

Oxygen siamna khawlte chu tunah DRDO-in enkawl mah se, kum khat leh a chanve a ral hnuah state sorkarin a enkawl chhunzawm tawh tura sorkar laipuiin a tih avangin, state-in a enkawl hun a thlen hunah sum leh technical lam puihna pe tura sorkar laipui a beisei thu CM Zoramthanga chuan Prime Minister hnenah a thlen a ni.

Zoramthanga chuan, Covid-19 vaccine pek dan sawiin, "Kum 18-59 inkarte tana precautionary dose vaccine pek tur chu sorkar laipuiin man chawi ngai loa pek theih turin ruahmanna siam se a duhawm. Covid-19 vanga thi chhungte hnena ràlna (ex-gratia) dilna 624 a lut tawh a, April 24, 2022 thleng khan mi 596 (95.5%) pek ni tawhin, a bak pawh bawhzui mek a ni," a ti.

Video conference-ah hian tun hnaia state leh UT-te dinhmun leh, ram pum anga hmalak ngaihna laite Ministry of Health & Family Welfare Secretary-in a lem hmangin a sawifiah a ni.