Mizorama bank-te'n mipui tana an tih tur tam tak an tih ve a ṭul - Governor

Governor Dr Hari Babu Kambhampati chuan nimin khan Raj Bhavan-ah Industrial Credit and Investment Corpo­ration of India Bank (ICICI Bank) hotute a kâwm a; Mizorama bank-te'n mipui tana an tih tur tam tak an tih ve a ṭul thu a sawi.

Dr Hari Babu Kam­bhampati chuan, commercial bank-te Mizorama an luh belh zel chu ṭha a tih thu a sawi rualin, "Bank-te hian mipui tana an tih tur tam tak an tih ve a ṭul. Mipui hnena loan pekah te, hmun danga bank customer-te'n hamṭhatna an neih angte Mizorama pek chungchangah te, central welfare scheme ṭha tak tak customer-te hriattir chungchangah Mizorama bank-te'n ṭan an lak lehzual a ngai," a ti.

Mizoram mipui tam zawkin sorkar laipui hnuaia an hamṭhatna tur scheme tam tak chu hriat lohna avangin an dawn loh thu sawiin Larsap chuan, "Bank official-te'n an customer-te chu central welfare scheme-te zawm turin an tur lui thei lo nachungin, central welfare scheme tam tak a awm thu leh a ṭhatnate hriattir hi an mawhphurhna a ni," a ti a; CSR kaltlanga mipui rawngbawlna leh vantlang tlana rotling siam kawngah ICICI Bank-in theihtawp chhuah se a duh thu a sawi.

ICICI Bank zonal head Vikas Mathur chuan, Aizawlah branch pathum leh Champhaiah branch pakhat an neih thu leh district dangah pawh hawn belh zel an tum thu sawiin, ICICI Bank-in ṭha takin banking an kalpui niin a sawi.

Vikas Mathur chuan, Covid-19 avangin kum hnih chhung an duh angin CSR an kalpui thei lo nia sawiin, "A bul ṭan nan aspirational district - Mamit district aṭangin CSR huanga hmalakna kalpui a ni dawn a, Mamit district-a beneficiary thlante chu ar vulh leh Agriculture leh a kaihhnawih thilah kan pui dawn," a ti.