Thingsiri Cultural Club-in lawmman an lawm
T Romana College-a Thingsiri Cultural Club chuan nimin khan an college-ah tun hnaia lawmman an lâk an lawm a, MJA president C Lalrambuatsaiha, Thingsiri Cultural Club adviser ni bawkin a hmanpui.
Thingsiri Cultural Club hi kum 2010-a din a ni a, academic session 2021-22 chhungin MSU Cup-ah Cheraw Kântluangah pakhatna, MZP Inter College Cultural Competition-ah Cheraw (Buhzai)-ah pahnihna leh Tribal Dance Hunt - Aizawl district-ah pahnihna an ni.
Lawmman an lakte lawmnaah hian MJA President chuan, Thingsiri Cultural Club chu ram leh hnam tana ding, hnam dang zinga Mizote pho langtu an nih thu a sawi a, "Mizote hian hnam dang angin infrastructure leh industry ropui nei ve lo mah ila, talent kan nei ṭha a, kan hnam zai leh làm hmangin khawvelin min hmelhriat ve thei a ni," a ti.
T Romana College principal Dr Jennifer Lalbiakdiki pawhin thu sawiin, "Kan college hnuaia mi Thingsiri Cultural Club-in trophy pathum ngawt tun hnaia an lak theih chhan chu zirlaite leh hemi lama theihtawp chhuahpui ṭhintu MZP leh MSU-te thlàwpna an dawn ṭhat vang a ni," a ti a; an college chu a din tirh aṭangin college zirlai luhna tur hre lote luhna a nih thu leh chu chu Pathian malsawmna a nih thu a sawi.