Hripui vanga task force member thi mi pathum hnenah râlna pe tawh
LTF/VTF Covid-19 Ex-Gratia Lumpsum Compensation Scheme hnuaiah local/village task force mi leh sa, an duty-na aṭanga Covid-19 káia thi mi pathum chhungte hnenah Mizoram sorkarin ràlna Rs 60,00,000 a pe tawh a; mi pathum dang dilna a pawm tawh bawk.
Vanglaini palai zawhna chhangin, Covid-19 Task Group on Insurance chairman Ramchuana, Finance (EA) additional secretary chuan, scheme hian March 31, 2022 thleng a huam tih a sawi a, "Scheme hi tàwp tawh mahse March 31, 2022 hma lama thite dilna ngaihtuah tur a la awm a, April 29, 2022 hian ngaihtuah kan tum," a ti.
Ramchuana chuan, task force member list an neih sa hmangin diltu te chu task force member an nih leh nih loh an endik ṭhin thu te, a dawng tur dik takin an dawn ngei theih nan uluk taka an endik ṭhin thu leh, pawisa chu a remchan dan angin bank account emaw, cheque emaw hmanga pek a nih thute a sawi.
Disaster Management & Rehabilitation department hotute chuan Vanglaini zawhna chhangin, Task Group aṭangin zangnadawmna dilna pawm tawh paruk an dawn tawh thu an sawi a, "Zangnadawmna pek turte hi Treasury-ah kan thehlut a, an pawm hnuah pawisa pek turin an rawn thawn lêt leh ṭhin. Dilna lut paruk zinga pathum chu pawisa kan pe tawh a, a dang pathum chu file a la kal mek," an ti.
Hriat theih chinah Ex-Gratia Lumpsum Compensation Scheme-ah hian Aizawla local task force 83 aṭangin mi 4,273 an inziak lut a, Aizawl páwna village task force 740-ah member 21,467 an awm. Task force member paruk chu Covid-19 vanga thi an ni tih sorkarin a pawm hnuah an chhungte hnenah Rs 20,00,000 ṭheuh ràlna pek tur a ni.