Champhaiah PMGKAY scheme inhrilhfiah

Champhai DCSO chuan nimin khan IPR conference hall-ah a thlàwna mi retheite hnena buhfai semna scheme, Pradhan Mantri Garib Kalyan Anna Yojana (PMGKAY) (Prime Minister Food Security Scheme for the Poor) chungchang inhrilhfiahna Azadi Ka Amrit Mahotsav hnuaiah a buatsaih a, bawrhsap James Lalrinchhana'n a hmanpui.

PMGKAY hi Prime Minister Relieve Programme a ni a, Mizoramah chuan May 2020-ah kalpui ṭan a ni. Covid-19 léng avanga ei leh bàra harsatna chhawmdawl nan NFSA beneficiary (AAY & PHH)-te hnenah a thláwnin mi pakhat zelah buhfai kg. 5 sem ṭhin a ni.

PMGKAY scheme hi mi retheite'n ei tur an neih theih nan te, ṭàm lai leh hripui lèn lai pawha chaw ngheia tu mah an thih loh nan duan a ni a; Mizoramah chuan Food, Civil Supplies & Consumer Affairs department hnuaiah kalpui a ni. PMGKAY hnuaia buhfai sem tur chu Food Corporation of India aṭangin Mizoram sorkarin FCSCA department hmangin a la a, retailer kaltlangin a dawngtu turte hnenah a sem ṭhin a ni.

Champhai DCSO tarlan danin, PMGKAY kaltlangin sorkar laipuiin thla tin Mizoram sorkar hnenah buhfai sem tur quintal 33,410.75 a pe ṭhin. PMGKAY hi phase paruk kalpui a ni a, phase rukna hi April 2022 aṭanga September 2022 thleng awh tur a ni. April 2022 chhung khan buhfai quintal 34,746.35 a thlàwnin sem a ni a, sorkar laipui buhfai pekin a daih lohna zawng quintal 1,335.60 chu Mizoram sorkarin a tum bawk.