KHAWTHLIR

Built Heritage of Mizoram 2021
INTACH, Mizoram Chapter lehkhabu buatsaih, 'Built Heritage of Mizoram 2021' tih chu April 26, Thawhlehni khan chief minister Zoramthanga'n CMO Conference Hall-ah a tlangzarh. Lehkhabu hi Mizorama in hlui ding lai chanchin ziahna a ni a, Aizawl, Lunglei, Khawzawl, Kolasib, Serchhip leh Siaha district-a in hlui 71 tarlan a ni. In 71 zinga 27 chu sorkar in a ni a, Assam Rifles enkawl lai in 17, kohhran enkawl in 14 leh mimal in 13 a tel bawk.

Thisen pe
Chaltlang Higher Secondary School NSS chuan nimin khan an sikulah thisen pek an huaihawt a, Civil Hospital, Aizawl tan thisen unit 37 an pe a, petute mipa 29 leh hmeichhia pariat an ni.

Heroin man
Mizoram police-a Aizawl District Special Branch chuan nimin khan Millennium Centre-ah Malsawmkimi (23) d/o Liankhara, Armed Veng South hnen aṭangin heroin gram 65 vela rit an man. Heroin hi tualchhunga hralhna ang chuan cheng nuai 1.75 hû a ni a, international market-ah chuan cheng nuai 32 chuang man a ni.

Minister-in hawng
Minister of state K Lalrinliana chuan nimin khan Kolasib Venglai Parish Hall-ah Blue Hill Engineering Mizoram Open Chess Tournament 2022 a hawng. Chess intihsiaknaah hian district hrang hrang aṭangin mi 72 an tel a ni.

Hmanrua sem
Cooperation department chuan nimin khan Champhai DCO pisa tualah Prime Minister Van Dhan Yojana kaltlangin Van Dhan Vikas Kendra Cluster mi 11 hnenah vaimin, hmarcha, aieng leh sawhthing herna kháwl, nuaina kháwl, pho rona kháwl an sem a; khuai khawite tana hmanraw chi hrang hrang leh thingpui chíngtute tan hmanruate an sem bawk.

Hriselna Kûtpui
India independence kum 75-na lawmna, Azadi ka Amrit Mahotsav pualin nimin khan Siaha RD block-a Chhaolô khuaa damdawi-inah Health Mela (Hriselna Kûtpui) buatsaih a ni a, Siaha SP VL Lura Hrahsel-in a hmanpui. Mela-ah hian doctor pariat an ṭhu a, inentirna stall 11 awmin, mi 437 an inentir a ni.

KCC campaign
Lawngtlaia Lead Bank Office chuan nimin khan sorkar laipuiin kut hnathawktute hamṭhat nana bank kaltlanga sum pûk theih dan a ruahman, Kisan Credit Card (KCC) loan puanzarna an buatsaih a, bawrhsap Dr Andrew H Vanlaldika'n a hmanpui. Campaign hi khaw hrang hrangah kalpui chhunzawm tum a ni.

Horti. Exhibition
Lawngtlaia Horticulture department leh Lawngtlai Florist Association (LFA) chuan nimin khan LADC conference hall-ah Horticulture Exhibition 2022 an buatsaih a, bawrhsap Dr Andrew H Vanlaldika'n a hawng. Exhibition-ah hian mi 40-in pangpar chi hrang 17 leh kut hnathawktu mi 20-in an thei leh thlai thar chi kua an pho chhuak a ni.