Bilkhawthlira kuhva ṭiak lei turin ngen

Kuhva Chingtu Cooperative Society (KCCS), Bilkhawthlir chuan thuchhuah siamin, state pawna kuhva ṭiak lei lo a, Bilkhawthlira kut hnathawktute'n kuhva ṭiak (polypot) an siamte leisak turin Mizoram mipui an ngen.

KCCS, Bilkhawthlir chuan, kuhva rah bakah, a chî/ṭiak siam, kuhva polypot chu Bilkhawthlira mi tam takin eizawn nan an hmang mek tih sawiin, Bilkhawthlir khuain kuhva polypot aṭangin kum khatah cheng nuai 150-180 inkar an a la lut ṭhin tih an tarlang a, "Kuhva a chî tura siam, polypot hi uluk a ngai em em a, kuhva kung puitling ṭha bakah rah ṭha leh hmin ṭha ngei hman tur a ni a, a kung naupang leh rah hmin ṭha lo chu a zîk a bûl duh a, kuhva huan siam tum tam takin an hlawhchham phah tawh ṭhin," an ti.

Bilkhawthir khua behchhan leh tláwm zawka siamin, Assam lamin kuhva polypot an buaipui ve ta fo nia sawiin KCCS chuan, "Tláwm zawk mahse kuhva rah ṭha ni lêm lo leh ṭo thei dêk dêk apiang an polypot ṭhin avangin lo leisak lo turin Zoram mipui kan ngen a ni," an ti a; Bilkhawthlir khaw mite chuan a chi atana ṭha ngei chauh an polypot avang leh chhungkua eng emaw zatin eizawn nan an hman avangin Bilkhawthlira kuhva polypot-te lei ṭhin turin mipui an ngen a ni.

KCCS, Bilkhawthlir tarlan danin, Bilkhawthlir khua hian kum 2021 khan kuhva aṭangin cheng nuai 800 vel an la lut a ni.