ASF laka invên dan tur sawiho

Khawzawl District Committee on African Swine Fever (DLCASF) chu an chairman CC Lalchhuangkima, district bawrhsap hoin nimin khan DC conference hall-ah an ṭhu a, vawk pûl hri, African Swine Fever laka invên dan tur an sawiho.

Ṭhutkhawmah hian, ASF a darh zel loh nan Khawzawl district-ah hmun dang aṭanga vawk leh vawk sa lak luh phal loh an rel a; district chhungah pawh khua leh khua inkarah vawk leh vawk sa lak luh leh hralh chhuah khap ni se, an ti.

Khawzawl DVO Dr C Lalsawiṭhuama tarlan danin, Khawzawl district-ah November 18, 2021 hnuah hun eng emaw chen ASF vei hmuh a ni lo a, April 12, 2022 khan Khawzawl Vengthar, Zuchhip leh Darngawnahte vawk a thi leh ṭan a, April 26, 2022 thleng khan Khawzawl district-ah ASF vangin vawk 78 a thi tawh a ni.