Kan candidate-te in thlan tlin chuan State-in thuneihna sang tak a pe ang - Dr Thangtea

MNF adviser Dr R Lalthangliana, minister chuan nimin khan New Siahaa an party campaign office-ah thu sawiin, "Kan candidate-te in thlan tlin chuan thuneihna sang tak state sorkarin kan pe ang," a ti.

Dr R Lalthangliana chuan, tun ṭuma MADC MDC inthlanpui awm turah an beih ngai loh BJP an beih thu sawiin, "A hma kha chuan Congress kan bei ṭhin a, he laia Congress leh BJP-te hi a mihringa thuhmun vek an ni a, danglamna an awm lo. MADC-ah hian Congress ngar ngar a la sorkar a, BJP a sorkar leh a, an thuhmun reng a ni," a ti a; MNF an sorkar a nih chuan an danglam tur thu a sawi.

MADC-ah MNF candidate-te thlan tlin an nih chuan an bial chhungah thuneihna sang tak an pe lo thei lo nia sawiin R Lalthangliana chuan, "Kan aiawha in thlan tlinte an nih avangin Aizawl aṭangin thil engkim kan rawn tih a rem lo ang a, anmahni thuneihna kan pe dawn. SEDP lama thuneihna leh he lam hna hrang hrang awmah thuneihna kan pe bawk ang," a ti.

Dr R Lalthangliana chuan, kum thum leh a chanve an sorkar chhungin inthlanna ṭum eng emaw zat an hmachhawn tih sawiin, "MP (Lok Sabha)-ah hnehna changin, Sinlung Hills inthlanah kan sorkar a, VC thlanah 80% kan la a ni. LADC-ah majority kan la a, CADC-ah pawh hnehna kan chang. AMC inthlanah pawh kan chak leh a ni," a ti a; MADC-ah pawh Pathian ṭanpuinain an chak dawn thu a sawi a ni.