BJP National GS-in dâwt sawi bànsan turin CM leh a kaihhruai sorkar a chah

BJP National general secretary (i/c North East) Ajay Jamwal chuan, MNF kaihhruai Mizoram sorkar chu sorkar laipuiin Covid-19 leng do nan nasa taka a puih tawh thu leh, chu'ng puihna sumte chuan mipui hnen a thleng lo ṭhina a lan thu a sawi a; chief minister Zoramthanga leh a kaihhruai sorkar chu dâwt sawi bànsan turin a chah.

Ajay Jamwal hian April 26, Thawhlehni zan khan BJP, Mizoram hruaitute a kâwm a; thu sawiin, "MNF sorkar hi central sorkarin Covid-19 hripui avangin nasa takin a pui tawh a, Mizoram sorkarin central aṭanga sum an dawnte hian mipui hnen a thleng lo ṭhin niin a lang," a ti.

Mizo mipuiin PM scheme a taka an chhawr theih nan BJP sorkar Mizorama a din hunah PM special pakage pek a nih tur thu sawiin Ajay Jamwal chuan, "Central aṭanga malsawmna tam tak Mizoramah a luhna turin MNF sorkar paihthlak a, BJP sorkar din ngei turin Mizoram mipui ka sawm a ni," a ti a; MNF sorkar mumal lo taka kal mek tihtawp a nih theih nan sorkar ṭha din a ṭul thu a sawi.

BJP National General Secretary chuan, kum 2023-a Mizoram inthlanpuiah BJP-in sorkarna an siam ngei dawn nia sawiin, BJP thawhpui turin mipui a sáwm a, "MNF party hi Delhi tlanga BJP ṭhian, Mizorama BJP paihthlak tumtu an nih avangin laikîng ang chauh an ni a, ze nghet nei lo leh mumal loin Mizoram mipui an hruai hi a pawi tak zet. Mizoram CM Pu Zoramthanga leh a kaihhruaite hian dâwt hmangin Mizo mipui an bum rei tawh dawn lo tih kan hriattir a ni," a ti.