Ni 22 hnua hripui vei hmuh tam ber ní

April 26, Thawhlehni khan Mizoramah Covid-19 vei mi 164 hmuh chhuah a ni a, kumin April 4 hnua hmuh tam ber ni a ni. Nimin khan hripui vei dam tawh mi 114 chhuahtir an ni a, hripui vanga thi an awm lo.

Thawhlehnia hripui vei hmuh chhuahte chu mipa 67 leh hmeichhia 97 an ni a; RAT hmanga hmuh 161 leh FIA hmanga hmuh pathum niin, positivity rate chu 18.08% a ni. RT-PCR leh TrueNAT hmangin swab sample endik ni mah se, positive an awm lo.

April 26-a Covid-19 positive vei hmuh mi 164 zinga mi 28 chu Khawzawl district-a Tlangpui khaw mite niin, hmuh tamna ber khua a ni a, Hnahthial khawpuiah mi 23 hmuh a ni bawk.

IDSP record angin, Mizoramah Covid-19 vei 2,27,152 hmuh chhuah a ni tawh a, mipa 1,05,780 leh hmeichhia 1,21,372 an ni a, mipa aiin hmeichhia 15,592-in an tam zawk. Nimin tlai dar 5 thleng khan mi 2,25,811 (99.41%) chhuahtir an ni tawh a, mi 696 (0.31%) thi tawhin, enkawl mek mi 645 (0.28%) an awm.

Nimin tlai dar 5 dinhmun angin, Siaha, Lawngtlai leh Champhai district-ah hripui vei enkawl lai mi 10 an tling tawh lo vek a; Saitual, Serchhip leh Mamit district-ah 100 aia tam an la awm thung.

Kum 2011 chhiarpui aṭanga chhûtin, Mizorama Covid-19 vei hmuh tawh 2,27,152 chu mi 1,000 zelah hripui vei mi 206 an awm ang a ni a; mi 1,00,000 zela Covid-19 vangin mi 63 an thi tawh ang a ni tih sorkar thuchhuakin a tarlang.