Pawl 6-8 ten Zo Nun an zir dawn

School Education minister Lalchhandama Ralte chuan, academic session kal mekah pawl 6, 7 leh 8 subject-ah Zo Nun tih telh a nih thu a sawi.

Vanglaini palai zawhna chhangin Edu­cation Minister chuan, Zo Nun chu additional subject anga a kal dawn thu a sawi a, "Zirlaibu thar hi Mizoramah a rawn thleng tawh a, sikul hrang hrangah sem niin, zirlaite'n an zir ṭan theih thuai beisei a ni," a ti.

Lalchhandama Ralte chuan, Zo Nun buah hian Mizo nuna entawn tlak te, Mizo mi chhuanawm te, Mizo thuam leh thil dangte zir a nih dawn thu sawiin, "Zirlaite'n hnam rilru an put theihna turte a awm," a ti a; Zo Nun zirlaibu chu zirlaite'n an ṭangkaipui ngei an beisei thu a sawi a ni.