Hunpui laiin hâlpuah leh silai lem vangin Mizoram pumah mi 30 chuang man an ni

Mizoram sorkarin Krismas leh kum thar vuakvetah hâlpuah, hâlmawi leh naupang silai lem a mu kâp chhuak theite Indian Penal Code (IPC) Section 188 hmangin a khap a; hunpui laiin dan leh sorkar thupek bawhchhia district hrang hrangah mi 30 chuang man an ni.

Dan leh thupek bawhchhia man zinga ṭhenkhat chu Court-a kalpui an ni a, ṭhenkhat chu zilhhau hnuah chhuah leh an ni.

District ṭhenkhata police, tlawmngai pawl hruaitute leh chanchinbumite chuan sorkar khapna hi khap loh lai ai chuan a ziaawm hle tih an sawi a; kum hlui thlah zan leh kum thar lawmnaah Aizawl bikah hâl puah ri hriat tur awm nual mah se, khap loh lai nena khaikhin chuan a puak nêp hlea hriat a ni.

Aizawl SP Office-a Crime Branch-in an chhinchhiah dan chuan, Aizawla police station (PS) pathum - Aizawl PS, Bawngkawn PS leh Vaivakawn PS-te chuan Krismas leh kum thar vuakvetah dan bawhchhia mi 22 an man a, chu'ng zinga mi pakhat chu kum 64 mi a ni a, naupang silai lem vanga man a ni.

An man zinga mi 13 chu hmeichhia, kum 30 chuang vek an ni a; hmeichhe pahnih chuan hâlpuah leh a kaihhnawih thil chi hrang hrang leh silai lem tam tham tak an kawl a, an pahnih hian Bawngkawn PS-a mite'n manin, rocket, bomb, hâlpuah, hàlzît leh hâlmawi an kawl leh hâl vang man an ni.

Aizawl PS-ah IPC 188 hnuaiah thubuai paruk an ziak lut a, Bawngkawn PS leh Vaivakawn PS-in thubuai pathum ve ve an ziak lut.

Police hotute sawi danin, an man zinga mi pahnih chu Court-ah thawn an ni a; naupang pawh man niin, chhuah lehnghal an ni thung. Ṭhenkhat chu in chunga hâl an nih avangin kut man chiah a awm lo a, vaukhânna (warning) pek erawh an nei. Man zingah hian hnam dangte pawh an tel.

Lunglei PS-a officer in-charge Zatluanga chuan, hâlpuah chu November thla aṭanga an enfiah reng avangin man tur a awm loh bakah, mihring man tur pawh an awm lo niin a sawi a; December 31 zanah erawh chuan Bazar Veng leh Chanmari velah puak a awm ve zauh thu sawiin, "Krismas báwrah chuan a puak lo hrim hrim," a ti.

Champhai additional SP-in a sawi danin, sorkarin khapna a chhuah chu theihtawp chhuahin an bawhzui a, Krismas hma aṭangin ṭum ruk an enfiah.

Ṭum khatnaah mi pahnih an man a, ṭum hnihnaah mi pathum man lehin, pawisa chawitira chhuah an ni. Ṭum thumnaah mi pathum an man leh a, IPC 144 hmanga thupek chhuahtu magistrate emaw addl. DC emaw ten FIR ziak tur an nih laiin chawlh hmanga an kal bo avangin an mante chu police-te'n an kawl hnuah an chhuah leh a ni.

Champhaiah hian December 31 zanah Venglai leh Vengthlangah bâk a puak meuh lo nia sawiin Addl. SP chuan, "Man tumin ṭan kan la nasa a, a cháng chuan naupang fel tawh takte kan leitir a, kan man phah châng a awm. Ni 31 zan khan hmun 10/20 velah puak a awm a, a puak rei lo thung," a ti.

Kolasib SP C Lalzahngoa chuan zawhna chhangin, Kolasib district-ah chuan hâlpuah aiin hâlzît lam man an nei tam tih a sawi a, "Halpuah leh silai lem vangin mi pali kan man a, Thana-ah hun eng emaw chen kawl hnuah chhuah leh an ni," a ti. Khapna thupek chuan hâlpuah chauh a huam emaw ti an awm nual thu leh inhriattirnaah fuh tâwk lo (communication gap) a awm nia a ngaih thu a sawi rualin, khapna chu a hlawhtling thawkhata a hriat thu a sawi.

Lawngtlai SP Lalsanglura chuan, sorkarin khapna thupek a chhuah chu Central YLA-te nen nasa takin an bawhzui a, Krismas hma aṭangin an enfiah nasa a, mipuiin an zâwm ṭhaa a hriat thu leh man ngai an awm loh thu a sawi. Krismas laiin hmun hnih/thumah hâlpuah hâl an awm a, YLA-te nen an enfiah hnuah a hâltute an bo hman zel avangin man an nei lo tih sawiin, "Mipuiin thu an awih a, kan hlawhtling khawp mai" a ti.

Lalsanglura chuan, van lama kah chhuaha puak chi erawh a awm ve zauh zauh nia thu an dawn thu a sawi rualin, Lawngtlai mipuite'n kum hnih/thum liam ta aṭangin hâl loh tur tih an inpawm nghet tawha an hriat thu a sawi bawk.

Siaha-a chanchinbu pakhat, Buannel editor CZ Hluna chuan, Siahaah chuan hâlpuah leh a kaihhnawih khap chu mipuiin ngaiah an nei tawha a hriat thu a sawi rualin, December 31 zanah erawh chuan hmun hnih/khatah puak a awm thu a sawi. Police, MTP, VDP leh JAC-te ṭangkawpin hmun hrang hrangah an duty thu leh kum hnih/thum vel chu hâlpuah tel mang loa an kal tawh avangin mipui nâwlpuiin an thlâwp ṭhaa a hriat thu a sawi bawk.

Mamit additional SP chuan, naupang chumchiap deuhin hâlpuah an hâl bâk hriat tur a awm meuh lo nia sawiin, "Kum dang aiin a ziaawm hle a, a puak miah lo tih tur chu a ni lo thung. Damcherra lamah lei tur a awm ve avangin puak chu a awm ve," a ti a; December 31 zanah hâl vak an awm lem lo a, zu rûi an awm nual thung avangin lock-up a dah ngai mi pahnih khat an awm niin a sawi.

Serchhipa police hotute chuan, Krismas hma aṭanga hâlpuah leh a kaihhnawihte bazarah leh dâwrah an enfiah reng thu leh man an neih loh thu an sawi a, "Veng hrang hrangah duty kan insiam a, kan cover hneh hlein kan hria. Hâlpuah puak a awm lo a, report pe turin kan inti a, man ngai an awm lo. Zu rûi jail-a dah an awm nual thung," an ti.

YMA sub-headquarters, Serchhip president R Sanghmingthanga chuan, "Serchhip DC, SP, IPRO leh YMA-te nen urlâwk zanah post hrang hrang kan tlawh kual a, December 31 zanah kan fang kual leh a, hâlpuah ri chu a awm a, mahse, khap leh ngenna an ngai pawimawh tih a hriat thung," tiin a sawi.