Pawna inthiar awm lohnaah Mizorama khaw 5 puan a ni

Mizorama khawpui panga (city & town) - Aizawl, Champhai, Khawzawl, Biate leh Khawhaite chu sorkar laipui aiawhte'n an enfiah hnuah, sorkar laipui chuan páwn lama inthiar awm lohna, open defection free (ODF)-ah a puang ta.

ODF-a puan tur hian Mizorama khaw ṭhenkhat chu sorkar laipui aiawh, Quality Council of India-te'n an enfiah a, ODF-a puan theih a ni tih an finfiah hnuah sorkar laipui chuan a puang ta a ni.

Khawpui panga, ODF-a puan tâkte hi local council leh village council ṭheuhte leh sorkar sikul tinte'n ODF-a puan theih an nih tuhu an hriattir hnuah, Aizawl Municipal Corporation leh DC pisaa official-te'n an enfiah a; chumi hnuah Quality Control of India (QCI)-in an enfiah leh bawk.

ODF-a puan an nih theih nan khaw hrang hrangte'n ṭan an la mek a, sorkar laipuiin a la pawmpui chiah loh, Mizoram sorkar leh district administration lamin an pawm tawh eng emaw zat a awm tawha thu dawn a ni. District zingah Champhai district chu Mizoram sorkarin ODF atan a pawm tawh a, ODF-a puan an nihna certificate pawh nikum lam khan Chief Secretary-in a hlan tawh a ni.

QCI team chuan Champhai khawpui chu December 20-21, 2016 khan an enfiah a, veng hrang hrang an fan kual bakah, sikul hrang hrang an enfiah. CHamphai khawpuiah hian mi 32,734 an cheng mek anga ngaih a ni.

Mihring 11,022 chenna Khawzawl chu December 21-ah enfiah a ni a; Champhai district-a Khawhai khua pawh December 21-ah endik a ni a, he khuaah hian mihring 2,496 an cheng. Serchhip district-a mihring 2,277 chenna Biate khua chu December 22-ah endik niin, chenna inte bakah, sikul leh biak-inte endik a ni.

Khawpui pangate ODF-a puan tak chungchangah hian UDPA minister Zodintluanga chuan, UDPA leh School Education department-a thawk te, district enkawltu official te, AMC, V/C leh L/C hotute thawhrimna vang a ni tih sawiin, lawmawm a tih thu a sawi a; khawpui dang leh thingtlang khaw dangte pawh ODF-a puan an nih theih nan chak taka hmalak mek a nih thu a sawi bawk.