KHAWTHLIR

Sarêp hâl
Kolasib District Wildlife Crime Control hnuaia sub-unit ten an man, sanghal sa rêp chu January 6, 2017 khan an manna hmun, Thingdawl Hmarveng Bazarah YMA Sub-Headquarters, Kolasib president C Liankunga'n a hâl ral.

Lirthei chesualah thi
Zodinpuii (35) w/o Laldinkima, Thingsul Tlangnuam chu Inrinni chawhnu dar 2:45 vel khan auto-rickshaw chetsualnaah a thi. Thingsul Tlangnuam aṭanga thu dawn danin, Zodinpuii hian Seling aṭangin an khaw panna atan auto-rickshaw a hmang a, Seling khaw chhungah truck kawng chhaka ding an su a, ká pawh chhawn lohin a thi a ni.

Health care
Mipuiten a thlawna inenkawlna an dawn theihna tura Mizoram sorkar duan, Health Care Scheme hnuaiah kum 2012 aṭanga August 2016 thleng khan damlo inenkawlna senso atan Rs. 48,05,13,547 pek a ni tawh. Health Care Scheme hnuaiah hian a hranpain budget-ah sum dah a ni loa, Asian Development Bank aṭanga sorkarin pawisa a puk, cheng vbc. 117. 80 chu corpus fund-ah dahin, a pung chu Finance department atangin quarter tin lak chhuah ṭhin a ni. Health Care Scheme hi enrolment hawn chhunga inziak lutte tan chauh chhawr theih a ni.

In sa tha
January 5 zana Lalduhsanga, Serchhip P&E Vengte in kang chu Serchhip-VIII village council leh P&E Veng Branch YMA bul tumin hnatlanga sak ṭhat a ni. In sakna atan hian bialtu MLA, chief minister Lal Thanhawla'n Rs. 10,000, Rural Development minister R Lalzirliana'n rangva bundle li leh Serchhip DC-in hnatlangte thingpui inna atan Rs. 5000 a pe.