PWD-in thál chhungin hna thawh tam an tum

Mizoram PWD chuan, ṭhál laia hna thawh theihna hun (working season) chhungin sorkar laipui leh state sorkar aṭanga an sum hmuhte ṭha taka hman a, kawng siam leh hmasawnna hna dang eng emaw zat thawh an tum.

PWD engineer-te chuan January 5-6, 2017 chhung khan Engineer-in-Chief pisa conference hall-ah an hna thawh dan thlirletna, review meeting an nei a, chak zawk leh nasa zawka hnathawh dan tur an ruahman nghal.

Tun ṭhál chhunga an hna­thawh tur zingah, state sorkar hnuaia kawng siamna tur sum an hmuh te, Road Transport & Highway Ministry aṭanga National Highway siamna tur leh kawng chhuat siamna tur te, PMGSY hnuaia kawng thar laihna tur leh kawng laih tawh blacktop-te a tel.

Meeting-a Chief Engineer pathumin an hnuai ṭheuha hna thawh leh hmachhawpte an sawifiah danin, tun hnaiah PMGSY hnuaia kawng 56 siamna tur sum hmuh a ni a, chu'ng zinga 22 chu kawng thar laihna tur leh a bak 34 chu kawng laih zawh tawh blacktop-na tur a ni.

Highway changtu chief engineer K Lalsawmvela sawi danin, tunah hian Serchhip khaw tawpa Sailiam kâwn aṭanga Lunglei Hrangchalkawn thleng NH-54 chu SLT Infra Ltd. an blacktop mek a, Hrang­chalkawn aṭanga Lawng­tlai thleng chu GP Project Ltd-in an blacktop mek. Lawngtlai aṭanga Siaha Zero Point thleng kawng thawm ṭhat hna ARS Ltd.-in an thawk mek a; Zero Point aṭanga Tuipang thleng leh Zero Point aṭanga Siaha thleng blacktop turin tender chhuah thuai tum a ni.

K Lalsawmvela chuan, NH-54 Ṭhuampui, Aizawl aṭanga Tuirial inkar chu VRS Construction (a neitu V Lalengzauva)-in an blacktop ṭha mek a, Tuirial-Seling pawh siamṭhat mek a nih thu a sawi a; Lunglei-Tlabung inkar kawng, NH-302 chu Lung­lei aṭanga km. 30 thleng siam turin hna thawh mek a nih thu te, km. 30-60 leh km. 60-94, Tlabung thleng siamna turin tender chu tun karah chhuah tur a nih thu a sawi bawk.

E-in-C R Vanlaltluanga chuan, PWD-in harsatna lian tak a tawh chu, hnathawh chi hrang hrang a hmuna viltu junior engineer leh section assistant an ngah tâwk loh vang leh SDO/AE an ngah tawk loh vang niin a sawi a; PWD-ah JE post 364 awm zing­ah hnawhkhah loh post 127 leh SDO/AE post 151 awm zingah hnawhkhah loh post 27 a awm thu sawiin, "JE pakhatin hmun hrang hranga hna eng emaw zat a rualin an vil ṭhin avangin hnathawh a chak thei lo," a ti.

Mizoram PWD-in Mizorama National Highway a enkawl dan a hmuna enfiah tur leh hnathawh dan thlirletna hun hmang turin Road Transport & Highway Ministry hnuaia hmarchhak bialtu (regional officer) Pawan Kumar chuan vawiin hian Aizawl a lo thleng dawn a; naktukah Highway engineer-te review meeting a neihpui ang.