Felkima thih thuah mi 2 man

K Lalfelkima (31) s/o K Lalrintluanga, Rengdil, Mamit district chu January 7, 2017 zingah Zemabawk North-a a thlen inah thia hmuh a ni a; mi kut tuara thi nia ngaih a nih avangin Bawngkawn Police Station-ah hriattir niin, police-te'n Inrinni khan rinhlelh thilah mi pahnih an man.

Thu dawn danin, K Lalfelkima hi January 6, Zirtawpni zan dar 10:30 velah a nupui hluite in, Zemabawk North-ah riak turin a thleng a; a hmai a vûn bakah, a hmui a thi avangin a nupui hlui chhungte'n a chhan an zawh chuan, Bawngkawnah mi ṭhenkhatin kut an thlak thu leh a lu ná a tih thu a sawi. Damdawi-ina hruai an tumin a duh lo a, nachhâwkna an pek hnuah sitting room-ah a riak a, a tuk zingah chuan a lo thi tawh a ni.

Bawngkawn Police Station aṭanga thu dawn danin, Lalfelkima thih thuah hian Timothy Lalrintluanga s/o Lalthlamuana leh kumtlinglo pakhat, Bawngkawna khawsa ve ve an man tawh. Mi pahnihte hian Lalfelkima hi kut chu an thlak a, mahse, an khawih na lo niin an sawi.

Hachhek Constituency Development Committee (HCDC) chuan thuchhuah siamin, an bial chhung mi K Lalfelkima chunga thil thleng chu ṭha lo an tih thu leh pawi an tih thu an tarlang a, "Tualthahnaa inhnamhnawihte man chhuak a, an phû tâwka hremna pe turin thuneitute kan ngen a ni," an ti.