MCI-in Referral Hospital an endik Medical college a beiseiawm rih lo

State Referral Hospital-a medical college, 'Mizoram Institute of Medical Education & Research' (MIMER) din tumna kal zelah, Medical Council of India (MCI) chuan January 5-6, 2017 khan State Referral Hospital an rawn enfiah. Medical college neih mai erawh a beiseiawm rih lo.

State Referral Hospital-ah medical college din theih a nih leh nih loh enfiah a nih chungchanga Vanglaini palai zawhna chhangin Health minister Lal Thanzara chuan, a building leh department awmte leh thil ṭul ṭhenkhatte chu ṭha ti mah se, a la tlin lohna lai an hmu tih a sawi a, "MCI aiawhte an fel em em a, mahse, kan la tlin lohna lai an hmu a, min pawmpui nghal mai a beiseiawm chiah lo. Building chu ṭha an ti a, mahse, mihring lamin kan la tlin lo a ni," a ti.

Health department hotute chuan, tun ṭum hi medical college atana tlin leh tlin loh enfiah vawi khatna a nih thu sawiin, la tling chiah lo mah se, hmasawnna a awm thu an sawi.

Health department hotute sawi danin, medical college din thei turin mipui lamin an la tam hneh lo a, OPD-ah ni khatah mi 400 tal inentir an awm a ngai a, chu chu tun dinhmunah an la tling lo. Thil dangah pawh a la tlin tawk lohna a awm.

Mizoram sorkar chu medical college din turin a inbuatsaih a, thawktute pawh State Referral Hospital-ah ṭhahnem tak a dah belh tawh bakah, department-te pawh hawn belh zel a ni. Health department chuan nikum July thla khan medical college din tura ngenna chu MCI-ah an thehlut.

Medical college bul ṭanna atan a tlem berah khum 250 a ngai a, OPD-ah ni tin mi 400 tal inentir an awm a ngai a, intensive care unit (ICU)-ah khum 20 tal a awm a ngai. Operation theatre, casualty leh blood bank leh thil dang dangahte pawh tlin ngai a awm a ni.