Sawhthing chingtute'n hralhna an hre rih lo

Mizorama sawhthing thar chhuahte hralh a hun chho a, mahse, a hlawma lei duh an la awm loh avangin sawhthing chíngtute'n harsatna an tawk mek a nia thu dawn a ni.

Mizoramin state páwna a hralh chhuah tam berte zinga mi, sawhthing hralh kawngah tun dinhmunah chuan a man mumal a awm thei rih lo. Kum dangah chuan November thla vel aṭangin Bagha, Assam-a sumdawngte hnenah hralh chhuah ṭhin a ni a, state páwna thawn chhuah turte chu Vairengte-a MAMCO checkgate-ah chhinchhiah fel vek a ni ṭhin a; kum khatah quintal 1,00,000 chuang thawn chhuah ṭhin a ni.

Kuminah sawhthing rate a mumal lo a, hralhna a la awm ṭha rih lo bawk a; Mizoram chhung hmun ṭhenkhatah kg. khat Rs. 8 vela hralhna awm mah se, a tlàwm em avangin sawhthing thartute'n an la hralh duh rih lo nia thu dawn a ni.

Hetih lai hian, sawhthing hralh dan enpuitu MAMCO chu Mizoram sorkarin a titawp tawh. MAMCO nodal department, Commerce and Industries department changtu parliamentary secretary Joseph Lalhimpuia chuan zawhna chhangin, kum 2008 tawp lama Congress party sorkar tirh aṭangin sawhthing lei leh hralh kawngah sorkar a inrawlh lo tih a sawi a, "Sorkarin rate a siam ngai lo a, zalen takin a leitute leh a hralhtu turte an indawr mai ṭhin a ni," a ti.