YMA hi a duh tan a hman sual theih - CYMA President

Central YMA pisa chu nimin khan kumin atan hawn ṭan a ni a, office hawnnaa thusawitu Central YMA president Lalbiakzuala chuan YMA chu a hmang sual duh tan chuan hmansual awl tak a nih thu a sawi.

Office hawn inkhawm hi CYMA gen. secretary Lalhmachhuana'n kaihruaiin Lalbiakzuala chuan, "YMA hi a hmangsual duh tan chuan hmasual awl tak tur a ni. A lo dintu kan missionary hmasaten an lo dinna rilru kan hriat reng a ṭul a ni. Kan rama thil ṭha lo tam tak siamṭhat nan te, mipuiten kan chan tur dik tak kan chan theih nante YMA chuan hma a la zel ang," a ti.

Kuminah pawh CYMA chuan kawng hrang hrangah ram leh hnam tan hma a lak zel dawn thu sawiin CYMA President chuan, "Ram leh hnam tan hian YMA chuan hma a la mai a, a kuang lo a nawr kan hre ngai lo," a ti a, an hun tawnin a rawn hrin chhuah ang zelin an hmalak dan kawng pawh a in thlak danglam zel thu a sawi.

CYMA President chuan CYMA-in sum a thawhchhuah hnem tawh thu sawiin, "YMA hmalakna hi a nep lo hle. CYMA sum thawhchhuahte hi kawng hrang hranga ṭangkai taka hman a nih ṭhin hian YMA nep lo zia a tilang," a ti.

Mizoram pum huapa YMA ten 2016 aia 2017-ah hmasawnna dik leh tha kan neih theih nan remhriatna leh inpekna thar nen hmalak ṭheuh nise a duhthu sawiin Lalbiakzual chuan, YMA member zawng zawngte chu Pathian hre reng turin a chah.

Inkhawmah hian kumin atana inhlantharna hun hman a nih bakah, Mizoram puma YMA member-te tan ṭawngṭaihona hun hman a ni.

Central YMA pisa hawn a nih rual hian Sub-Headquaterrs YMA Office hrang hrang, Lunglei, Champhai, Kolsib, Serhhip leh Mamit-te pawh hawn nghal a ni.