KHAWTHLIR

Football team-in thisen pe
Santosh Trophy North East Zone Qualifying khela Shillong-a kal Mizoram football team chuan, nimin khan NEIGRIHMS Hospital-a Mizo damlo tan thisen unit riat an pe. A petute hi player pasarih leh official pakhat an ni.

Scho pek zat
Kum 2012-2016 chhungin MSCTE hnuaia computer institute-a zirlai 2761 hnenah scholarship pek an ni a, scholarship atan hian Rs. 4,00,52,900 sen a ni. MSCTE hnuaiah hian computer training institute affiliate 29 an awm a, computer institute-te affiliate an nih hnuah hian CCA leh DCA mi 3091 in an zir chhuak tawh a ni.

City bus 266
Transport department chhinchhiah danin, November 2016 thleng khan Aizawl city bus plying permit nung 266 a awm a, chu'ng zinga 151 chu kum 10 aia rei tlân (service) tawh an ni.

ACB case
Anti Corruption Bureau (ACB) chuan kum 2016 chhung khan thubuai pangaah mi 19 lakah thubuai an ziak lut. ACB-te'n thubuai an ziah luhte chu, Ramhlun Sports Complex huam chhunga ram dan dik lo taka hralh leh inpek danah te, Raichhawk zau Watershed Project atana sum ruahman tihchingpen chungchang te, Pang khuaa mipui sum tichingpen chungchang te, Saizawh ‘E’ khuaa mipui sum tihchingpenahte leh NLUP hnuaia thuneihna hmansualahte a ni.

Pisa hawng
MHIP General Headquarters chuan, nimin khan kumin atan an pisa an hawng. Pisa hawn inkhawmah hian an president Lalthlamuani'n thu a sawi.

IKK Ṭhalai dincham
Nimin kha Isua Krista Kohhran Ṭhalai din champha ṭum 41-na a ni a, Mizoram puma IKK ṭhalaiten vantlang tana thil tha tih nan an hmang a; Central Ṭhalai thuchhuak angin Social Work Day atan hman a ni.