Thla riat chhungin ram dang Meizial báwm 1,45,566 man

Mizoram State Tobacco Control Society (MSTCS) chuan, nimin khan IPR directorate conference hall-ah kum 2017 atana inhlan tharna leh quarterly review meeting an hmang a; nikuma Joint Operation on Contraband Cigarette and Other Tobacco Products kalpuinaah dan zâwm loa ram dang aṭanga meizial lak luh báwm 145,566 man a nih thu an tarlang.

Inkhawm hi MSTCS state nodal officer Dr Jane R Ralte-in a kaihruai a; Indian Society on Tobacco and health (ISTH) Mizoram Chapter vice president VL Bela'n kum 2017 atana Pathian hnena inhla ntharna hun a hmang. ISTH Mizoram president Lal Riliani'n MSTCS-a thawkte fuihna thu a sawi.

Chawhnu lamah MSTCS hnuaia district hrang hrang report ngaihthlak niin, sawiho nghal a ni. Report-a a lan danin, district tinah zuk leh hmuam ti ṭhinte'n nghei an duha puitu tur Tobacco Cessation Clinic (TCC) a awm tawh a, December 2016 thleng khan mi 11,289-in TCC an pan tawh a ni.

An tarlan dain, May 2016 aṭangin Joint Operation on Contraband Cigarette and Other Tobacco Products kalpui a ni a, hemi hnuaiah hian MSTCS bakah, Legal Metrology, CID (Crime) leh Taxation department-te an thawkho. Joint operation-ah hian May-December 2016 chhung khan ram dang meizial (foreign cigarette) báwm 1,45,566 an man a ni.