Lungleiah Road Safety Week

January 9-15, 2017 chhung awh tur, 28th Road Safety Week chu nimin khan Lunglei SP conference hall-ah SP Zosangliana'n a hawng. Week pual hian No Tolerance Week hman zui nghal a ni.

Week hawn in­khawm hi addl. SP J Lalmuankima'n a kai­hruai­ a; thuswitu SP Zosangliana chuan, "Lirthei khaltuten kea kalte an ngaih pawi­mawh zia tilangtu chu road safety hi a ni. Kum 2016 Krismas leh kumthar inkarah traffic police, VDP leh YMA te thawhhona ṭhat avangin accident a awm loa, a lawmawm hle," a ti.

Hunpui laiin highway patrolling hmun hrang hrang ah neih a nih thu sawiin Lunglei SP chuan, "Highway patrolling hian lirthei chesual tur a veng a ni. Zu rui chung leh physical fitness lo a motor khalh an awm leh awm loh te check ṭhin a ni a, dan bawhchhia te chu ngaihnat thiamna awm lo a hrem an ni," a ti a, mipuite chu an himna traffic police-te thu awih a, ṭawiawm theuh turin a chah.

Lunglei SP tarlan dan­in, kum 2016 chhungin an district chhungah lirtheia chetsualna ṭum sarih a thleng a, mi pasarihin nunna an chan a ni. Nikum chhung vek khan lirthei dan bawhchhia two wheeller 1001, three wheeller 865 leh four wheeller 1035 a vaiin 2901 man a ni a, dan bawhchhiate pawisa chawi tlingkhawm chu Rs.8,53,800 a ni.

Inkhawmah hian Traffic OC K Vanlalsangi chuan lirthei khalhtu leh neitute'n an zawm tur dan chi hrang hrangte a sawi a ni.