Wine hralh theih loh vangin grape lei lo

Hnahlan Grapes Growers Society (HGGS)-in port wine a siam chhuah chu hralhna a awm tak loh avangin, nikum aṭang khan grape lei an chawlhsan.

Thu dawn danin, Mizoramah MLPC Act hmanga zu zawrh a nih hnuah Hnahlan leh a chhehvel aṭanga port wine an siam chhuah chu hralhna tur a awm tawh loa, kum 2015-a grape an um sa pawh tunah hian hralhna tur an hriat loh avangin a zatve aia tam mah an la kawl a, hemi vang hian HGGS hian nikum atang khan Grape hi a lei tawh rih lo a ni.

HGGS hruaitute sawi danin, Hnah­lan leh a chehvela grape an thar chhuah chu port wine an siam chhuah mek 'Zawladi' aia ṭha zawk siam nan a hmantlak tih sawiin, "Hemi tur hian khawl leh hmanraw dang tih changtlun a ngai a, chumi ti tur chuan pawisa kan neih loh avangin hma kan la thei rih lo," an ti a, Mizoram sorkar ṭanpuinain hma thar lak lak an tum mek thu an sawi.