Nikum chhungin sa pel ru leh ramsa zuar mi 24 man an ni

Environment, Forest & Climate Change (EDCC) department chhin­chhiah danin, January - December, 2016 thleng khan sa pel ru leh ramsa zuar mi 24 man an ni.

Chief Wildlife Warden Liandawla hnen aṭanga thudawn danin nikum chhung khan sa pel ru leh ramsa zuar man hi June leh September thla khan an tam ber a, sa pel man tamna ber chu chu Dampa Tiger Reserve niin, mi 12 man an ni.

Sapel an manna hmun dangte chu - Kolasib Forest Division huam chhungah mi pali, Lunglei Forest Division-ah mi pahnih leh Aizawl Forest Division, Champhai Forest Division, Darlawn Forest Division, Mamit Forest Division, Aizawl Wildlife Division leh Khawzawl Wildlife Division-ah mi pakhat ṭheuh man an ni.

Liandawla chuan sapel an mante chu an chungchang ngaihtuah turin Court-ah an thawn tih sawiin, "Court-in thutlukna a siam anga hrem an ni a, an hrem dan a inang lo," a ti.

Chief Wildlife Wardern chuan dan loa sa pel ruk leh ramsa zuarte chu pawisa chawi leh lungin tan thlenga hrem theih a nih avangin, a ruka sa pel leh zawrh chu dan bawhchhiatna a ni tih mipuiten hre thar leh se a duh thu a sawi.

Zawhna chhangin Liandawla chuan, sorkar kum kal mekah hril leng avangin saza 115 an thi tih sawiin, "Hemi hun­chhung hian Lunglei Forest Division huam chhungah saza thi tam berin 26 a awm a, Aizawl Forest Division in dawtin 25 a awm a ni," a ti.