Zirtirtute hlawh pe turin sorkar phût

MNF party chuan thuchhuah siamin, Mizoram sorkar chu SSA hnuaia zirtirtute ngaihthah­ah an puh a; SSA hnuaia zirtirtute chu a thawh hlawh pe thuai turin an phût.

MNF chuan, sorkar laipuiin khua leh tuite zirna lamah a ngaihtuah hle laiin, Mizoram sorkarin SSA zirtirtu, mi sang têlte chu an thawh hlawh thla eng emaw zat a pek loh avangin pawi an tih thu an sawi a; CSS hnuaia Hindi zirtirtute hlawh pawh thla riat/kuate a batsak fo niin an tarlang.

MNF sorkar lai, Dr R Lal­thang­liana School Education minis­ter a nih laiin SSA zirtirtute hlawh pek theih loh a awm ngai lo nia sawiin, MNF chuan, "Eng emaw thilah a ṭul cháng chuan thawktute hlawh kha advance-in a pe hial zawk ṭhin. Congress sorkarin kum riat ṭha sorkarna a chelh chhung hian Mizo Kristiante hunpui ber, induhthawh hun lai tak Krismas dawnah thla eng emaw zat batsaka hlawh a pe thei lo ziah hi a mak hle," an ti a; thawktute hlawh pek theih loh chu zirnain a chhiat phah ṭhin niin an sawi.

MNF party chuan, SSA-a thawkte hlawh chu thil fel lo leh dik lo lai zawng zawngte hâi chhuak a, inthlah dah loa chingfel thuai tur leh a hun takah an thawh hlawh pe zel tawh turin Mizoram sorkar an phût a ni.