Sorkarin grape wine a khap Inhriatthiamnain siam a phal ; Grape chíngtute'n state páwna hralh an duh

March 25, 2022 khan chief minister Zoramthanga hoa Council of Minister ṭhukhawm chuan zu khapna kalpuina tura duan, Mizoram Liquor (Prohibition) Draft Rules, 2022 a pawm. Rules pawm tâk chuan grape wine siam leh zawrh a khap. Hetih lai hian, Champhai leh Hnahlan winery-ah chuan sorkar hriatthiamnain wine siam mek a ni thung.

Grape chingtute hnen aṭanga Vanglaini thu dawn danin, wine siam leh zawrh phal chungchang chu Chief Minister, Deputy Chief Minister leh sorkar hotu dangte an sawipui tawh ṭhin a, mahse, an ngennain awmzia nei loin, Council of Minister ṭhukhawm chuan wine siam leh zawrh khapna huam tel MLP Rules a pawm a ni.

Chutih rualin, sorkar thuneitute aṭanga thu an hmuh angin, tunlai hian inhriat­thiamnain winery-ah grape wine an siam mek a, mahse, sorkarin siam a phal loh avangin a hralhna lamah harsatna an tâwk. Tun hmaa an hralh chanve pawh an hralh chhuak pha lo a ni.

Wine an hralh chhuah tlem avang hian grape pawh a hek lo a, grape dahna turah harsatna an tawk ṭan. Tun ang renga an kal a nih chuan tuna grape rah mekte lawh a hunah chuan a dahna turah harsatna an tâwk dawn tih an sawi.

Grape chíngtute chuan, wine chu Mizorama siam leh zawrh phal an duh ber tih sawiin, "Hei hi sorkarin a remti ngang lo a nih pawhin state páwna hralh chhuah tal min phalsak se kan duh hle. State páwn lam nen pawh kan inbe reng a, mahse, MLP Rules-in state páwna hralh pawh a khap tâk avangin kan inbe chhunzawm thei ta lo," an ti.

Tarlan tawh angin, wine siam leh zawrh chungchangah hian ràwn an nih angin Mizoram Kohhran Hruaitute Committee leh Central YMA chuan zu lam hrim hrim zawrh ṭha an tih loh thu MLP Rules zir chiangtu Committee-ah an thlen a ni.

MLP Rules zir chiangtute'n thutlukna an siam hnu, February 4, 2022 khan Champhai leh Hnahlana grape chíngtu pawl hruaitute chuan chief minister Zoramthanga leh deputy chief minister Tawnluia an hmu a; MLP Rules duan meka wine siam chhuahah alcohol 11% telh phalsak tur leh an wine kawl mekte Mizorama hralhna ngaihtuahpui turin an ngen.

Zawhna chhangin grape chíngtute chuan, an ngenna chungchangah thuneitute aṭanga chhànna an hmuh awm chhun chu inhriatthiamna hmanga wine siam a nih mai thu an sawi a, "Dan hnuaia siam leh zawrh chhuah chu an phal ngang lo a ni," an ti.