Union MoS Bhagwant a rawn zin

Chemicals & Ferti­lizers leh New & Renewa­ble Energy enkawltu union minister of state Bhagwant Khuba chuan nimin khan Mizoram a rawn tlawh a, Aijal Club-ah chief secretary Dr Renu Sharma bakah, Power & Electricity, Agriculture leh Tourism department hotute a kâwm.

Chief secretary Dr Renu Sharma chuan, Mizo­ram dinhmun tlang­pui - eizawnna, khaw­tlang nun, Mizo hnam nun leh Sustainable Deve­lopment Goals (SDGs)-a hmalaknate a sawi a ni.

Power & Electrici­ty secretary H Laleng­mawia'n kawlphethaa Mizoram dinhmun tlangpui a tarlang a; kawlphetha mamawh san lai berin megawatt 155 mamawh a nih thu te, tui chakna hmangin kawlphetha MW 29.35 siam chhuah a nih thu te, ni zung chakna hmangin MW 3.85 siam theih a nih thu leh kum 2021-22 chhungin solar power MU 3.39 siam chhuah a nih thute a sawi.

Chemicals & Ferti­lizers Minister of State hnenah hian Agricul­ture Additional Director chuan, Mizo­rama chemi­cal fertilizer hman dan leh mamawh dan tlangpui a tarlang. Mizoramah ram hectare khat zelah chemical fertilizer kg. 70 zel hman ṭhin anga chhût a nih thu te, wholesale dealer 19 leh retail-a hralhna dawr 67-te'n Mizoram puma fertiliser mamawh an châwm thu te, Mizoramah ram hectare 26,730-a zauah oil palm chìn mek a nih thu leh district pasariha khaw 197-ah oil palm chìn a nih thute a sawi a ni.

Tourism Director pawhin tourism lama Mizo­ram hmalakna te, Mizo­ramin Responsible Tourism Policy a neih thu leh an hmachhawp ṭhenkhatte a tarlang bawk.

Bhagwant Khuba hian nimin vêk khan chemical fertilizer zawrhna dawrte a tlawh a ni.