Cycling Rally leh Marathon buatsaih

India independence kum 75-na tlin lawmna, Azadi Ka Amrit Mahotsav pualin nimin khan Lunglei leh Champhaiah Cycle Rally leh Marathon buatsaih a ni.

Azadi Ka Amrit Mahot­sav in Jan Bhagi­dari mode puala nimina Lungleia Cycling Rally buatsaih chu Lunglei District Cycling Association leh NYK bultuma huaihawt a ni a, Lunglei DC Kulothungan A-in a vailiam. Rally-ah hian mi ṭhahnem tak telin, Lunglei DC pisa kawt aṭangin Sethlun helipad thleng an tlan a ni.

Champhaiah chuan nimin zing kar khan Planning & Programme Implementation depart­ment leh DC pisa bultumin Marathon leh Cycle Rally buatsaih a ni a, bawrhsap James Lalrinchhana'n a vailiam. Rally-ah hian mi 107 an tel a, Chhangphut Field aṭanga tlan ṭanin, Vengsang kâwn thleng an tlân a, a tàwp khârna inkhawmah lawmman sem a ni.

Nimin vêk khan Kolasib-ah pawh Azadi Ka Amrit Mahotsav pualin DC Office leh Kolasib Florist Association-te'n DC Circuit House tualah Flower & House Plant Show Competition an buatsaih a, mi 17 an tel. 05 Riders-in Kolasib district-a home pathum - Enna In Boys Hostel, Thutak Nunpuitu Team leh Audrene Scism Children Home-ah ṭanpuina Rs 5,000 ṭheuh an hlan bawk.