CSS Hindi zirtirtute dinhmun siamṭhat dan Kawng zawnpui turin Governor an ngen

Mizoram Hindi Shikshak Sangh (CSS) hruaitute chuan nimin khan Raj Bhavan-ah Governor Dr Hari Babu Kambhampati an kâwm a; Mizorama Hindi tih lâr a nih dan tur leh Hindi zirtirtute dinhmun siamṭhat ngai laite sawipuiin, an dinhmun siamṭhat a nih theih nana kawng zawnpui turin MHSS hruaitute chuan Governor an ngen.

Governor hian Mizorama CSS hnuaia Hindi zirtirtu pawl, Mizoram Hindi Shikshak Sangh (MHSS) hruaitute chu Mizorama Hindi zirtirtu rawih dan te, harsatna an tawhte leh Mizoram mipuiin Hindi chungchanga rilru an put dante a zawt a ni.

Larsap chuan, Hindi chu India ramah mi dangte nena inbiakna ṭawng lâr ber a nih thu leh zir uar ṭha a tih thu a sawi a, "Mizo ṭhalaite'n Hindi nâl taka an thiam chuan Mizoram páwn, Hindi ṭawng hman tamnaah Hindi thiam lo aiin an tlángnél ngei ngei dawn a ni," a ti a; chutih rualin, zir tura innawr luih theih a nih loh thu a sawi.

Ṭawng chungchangah fimkhur zawk leh mi rilru tina loa hmalak a ṭhat thu sawiin Kambhampati chuan, "Hindi pawimawhna leh ṭangkainate kan inhrilh tam chuan zir duh leh thiam duh pawh an pung sawtin a rinawm," a ti.

MHSS chuan, sorkar laipui aṭanga scheme a awmin rawih an ni a, scheme a tàwp apiangin bàn an nih ṭhin thu te, chutiang avang chuan tun hnaiah pawh harsatna tam tak an tawh thu te, upat hman tawh avanga rawih nawn theih lohte an awm ṭhin thu te, Hindi teacher an nih anga an hna chu eizawnna ber atana hman ngam a harsat ṭhin thute an sawi.

MHSS hruaitute chuan, Mizorama sorkar primary school leh middle school-ah Hindi chu subject pakhat, zirlaite'n an zir vek ngai a ni a, high school-ah erawh chuan duha zira zir loh theih a ni thung tih an sawi a; Hindi chu high school-ah pawh compulsory subject a nih a ṭul hlea an hriat thu an sawi bawk.

MHSS hruaitute tarlan danin, CSS hnuaia Hindi zirtirtute chu hun eng maw chen chawlhtir an nih hnuah tun hnaiah sorkarin a la thar leh a, kum 2021 khan mi 541 leh kuminah mi 314 lak an ni.