Sorkar hnathawk post ruak hnawhkhah chungchang zir chian mek a ni - Tawnluia

Mizoram Government Driver's Association (MGDA) chuan nimin khan Synod Conference Centre-ah General Conference vawi 29-na an hmang a, deputy chief minister Tawnluia'n a hmanpui. Tawnluia chuan, sorkar hnathawk post ruak hnawhkhah tur chungchang zir chian mek a nih thu a sawi.

Deputy Chief Minister chuan, kum hnih chhung hripuiin khawvel hmun tin a tuam angin Mizoram pawh a tuam thu a sawi a, "Hripui donaah sum leh pai kan séng nasa a, engmah ti thei loin min siam. Department hrang hranga thawktu indaih lohna pawh duh angin a tih hleih theih loh," a ti.

Hripui dinhmun a ziaawm chho tih sawiin Tawnluia chuan, "A theih ang angin post ruak hnawhkhah kawngah sorkarin ṭan a la dawn a, post thar siam chu a la harsa rih ang a, post ruak hnawhkhah erawh chu kan tithei thuai tawh turah kan ngai. Tunah hian hna ruak hnawhkhah tur chungchang zir chian mek a ni," a ti a; sorkar driver-te chu traffic rules ngai pawimawh tur leh sorkar hotu lute hnai taka hrawn leh enkawltute an nih angin rinawmna leh thuruk vawn theihna nei turin a chah.

Conference-ah hian MGDA member thite sûnna leh hruaitu hlunte chawimawina hun hman a ni a; rorel leh hruaitu thar thlan a ni bawk.

MGDA hi kum 1964-ah din niin, member 700 an awm a, sub-headquarters pariat leh branch panga an nei. Kum 2019-2022 chhungin an member 54 an thi a, kum 2018-2022 chhungin pension-a chhuak 75 an awm a ni.