Ramngaw leh thing humhalh inzirtir

Mizoram State Legal Services Authority (MSLSA) chuan nimin khan Ailawng khuaa Khuangchera Hall-ah ramngaw leh thing humhalh inzirtirna an buatsaih a, MSLSA executive chairman Justice Michael Zothankhuma, Gauhati High Court judge-in a hmanpui.

Justice Michael Zothankhuma chuan, mi tinin thing leh ramngaw humhalh nacháng an hriat a pawimawh thu sawiin, "Thing ding sa humhalh bakah a tam thei ang ber phun belh hi khua leh tui ṭhate tih tur a ni," a ti a; thing ding sa humhalh a, ṭul loa thing kit lo tur leh a tam thei ang ber phun belh turin mipui a sáwm.

Khualzahawm Justice Ajit Borthakur, Gauhati High Court judge pawhin thu sawiin, Mizoram chu India ram state zinga thing leh mau la nei ṭha zinga mi nia a hriat thu a sawi a, "A awm sa humhalh leh phun belh zel a nih loh erawh chuan Mizoram hian hma lam hun duhawm tak a nei bik lo ang," a ti.

Preservation of Trees & Conservation of Forests seminar hi MSLSA secretary R Vanlalena'n a kaihruai a, Ailawnga high school leh middle school zirlai te, tlawmngai pawl hruaitu te, VC member-te leh MZP hruaitute an tel a ni.