Lunglei MZP-in MCS dah belh an phût

MZP, Lunglei bultumin nimin khan Lungleia MCS officer dah belh phûtin DC pisa tualah lungawi lohna lantir a ni. Lunglei MZP hruaitute chuan, an district-ah MCS officer post 21 a awm laiin, mi pakua chauh dah an nih avangin officer an indaih lo hle tih an sawi.

Lunglei MZP chuan, nikum aṭang khan Lungleiah MCS officer indaih lohna sukiang turin sorkar an lo ngen tawh thu tarlangin, "MCS transfer & posting order pawh kan lo hâl tawh. April 2022-a MCS officer transfer & posting order chhuak tharah Lungleia awm MCS pahnihte kaisan avanga hmun dangah sawn an nih hnuah, mi dang dah belh an awm leh si loh avang te, loh theih loha leave la an awm bawk avangin tun dinhmunah MCS officer pasarih chauh an awm mek a ni," an ti.

Vawi tam tak an ngen hnuah pawh sorkarin a ngaihsak lo tih tarlangin Lunglei MZP chuan, "Mizoram sorkar hian Lunglei mipui hi a hmusit hleah kan ngai. Officer pakhatin department pahnih, pathum an kawp avangin mipui tan harsatna nasa tak a thleng mek a, kawng hrang hrangah officer indaih loh avang hian kan district mipuite'n harsatna an tâwk mek a ni," an ti a; an harsatnate chu hriain sorkarin an ngenna an tihhlawhtlin ngei an beisei thu an sawi bawk.