MNF candidate-te thlang turin chah

MNF adviser Dr R Lalthangliana chuan, MNF chu nakkum kum tawpa Mizoram inthlanpuia sorkarna siam leh mai tur an nia sawiin, MADC-ah an thawhpui theih tur MNF candidate-te thlang tling ngei turin Siaha district mipui a chah.

Dr R Lalthangliana chuan April 27, Nilaini khan Siaha district-a khaw hrang hrangah thu sawiin, Congress party an hniam zel thu leh ZPM pawh ṭín ruak khawn rîk ang chauh an nih thu a sawi a, “Nakkum kum tàwp inthlanpuia state-a sorkarna siam leh mai tur MNF-te’n kan thawhpui theih tur MNF MDC candidate-te lo thlangtling ngei ngei ang che u,” a ti.

R Lalthangliana chuan, “State sorkarin council area-ah kan sangáwi zâwnpuite an sorkar chuan department hrang hranga hmalaknate dawhkân khatah kan kîlpui thei dawn a, kan duh tak, kan fahrinte an sorkar chuan a enkawl dan a danglam bik hle dawn a ni,” a ti a; Siaha district-ah hian thil tam tak tih tur hmachhawp a awm thu a sawi.

Project chi hrang hrangah state sorkarin a tum ve turte chu chief minister Zoramthanga hoa an tih theih nan MADC-ah MNF an sorkar a ngai nia sawiin R Lalthangliana chuan, “Hmasawnna danglam tak in hmu dawn a, kan duh záwng tak in tih chuan in duh záwng tihsak che u hi kan bat ve a ni. MNF candidate in vote chuan keimah leh Pu Zoramthanga sorkar in vote tihna a ni ang,” a ti.