Kum 2023-ah ZPM kan sorkar dawn - Lalduhoma & Sapdanga

ZPM leader Lalduhoma chuan, kum 2023-ah ZPM-in sorkarna an siam dawn thu leh an corrupt (eiruk) ve dawn loh thu sawiin, MADC chu MNF sorkar hnuaia awm turah inngai lo turin a chah. ZPM working president K Sapdanga pawhin, kum 2023-ah ZPM an sorkar dawn tih chu mipui titi a nih tawh thu a sawi.

Lalduhoma hian Tokolo, Bymari, Lomasu leh Laodaw khuate a tlawh a; thu sawiin, "ZPM-in kum 2023-ah sorkarna kan siam dawn a, ZPM hun a inher chhuak tawh dawn. MADC hi MNF sorkar hnuaia awm turah lo inngai suh u," a ti.

ZPM Leader chuan, Mizoram hruaitute corruption-ah an fihlîm loh avangin ram a dam thei lo tih sawiin, "Keini chu kan corrupt ve dawn lo a ni," a ti a; kalphung thar an aupui thu a sawi.

Lalduhoma chuan, Zoram sum enkawltu atan mipuiin MNF hotupa ber an ring zo tawh lo nia sawiin, "Krismas vawi khat an hmang leh ang a, an hun a zo tawh dawn. An hotupa thusawi hi Zoram mipuiin kan ring thei lo a, amah ngei pawh hian a awih kan ring lo. MNF unaute pawh inher rem se, ZPM-ah an tan hmun a awm a, thawhpuiah kan sáwm a ni," a ti.

India ramah Congress party an tê tial tial nia sawiin Duhoma chuan, "Mizoramah pawh Congress-in hun rei tak ro an rêl hnuah an tê tual tual a, Congress tan bial him a awm tawh lo," a ti a; Congress party mite chu hun inher milin insiam rem se a duh thu leh an tan ZPM-ah hmun a awm reng thu a sawi.

Lalduhoma chuan, Tokalo biala historical thil hlu tam tak awm leh Phúrà phai zawl zau tak awmte chu ZPM a sorkar hunah MDC-te nen thawkhoin khualzin hîp nan an siam dawn thu a sawi a; MADC inthlanpuiah ZPM candidate-te vote vek turin mipui a sáwm a ni.

ZPM working president K Sapdanga chuan April 27, Nilaini zan khan Na-aohtlah (Niawhtlang)-a vantlang inkhawmah thu sawiin, "Kum 2023-ah chuan ZPM hi a sorkar dawn tih hi mipui titi a ni tawh a, sorkar kan hrawn tawhteah ram hmasawnna hna thawh dan mipuite'n chiang takin kan hre vek a ni," a ti.

K Sapdanga chuan, MADC inthlan tura ZPM candidate-te thlan tlin an nih chuan an tlinna bialah danglamna an hmu ngei dawn tih a tiam a, "Dikna, rinawmna leh huaisenna nen ram rorelnaa Pathian ram tun din tumna rilru pu chungin hna kan thawk dawn a ni," a ti a; opposition ni chunga ZPM MLA-te leh councillor-te hnathawh dan chu MADC-ah pawh tih ve theih a nih thu a sawi.